गुन्हे वृत्त

चाइल्ड किडनॅपिंगचे आरोप
असल्याचे सांगत फसवणूक

पिंपरी, ता. ३१ : ह्यूमन ट्रॅफिकिंग, चाइल्ड किडनॅपिंगचे आरोप असलेल्या प्रकरणात आरोपी असल्याचे सांगत हे प्रकरण मिटविण्यासाठी एका महिलेकडे पैशांची मागणी करीत २२ लाख ८५ हजार रुपयांची फसवणूक करण्यात आली. या प्रकरणी महिलेने फिर्याद दिली आहे. त्यानुसार सुमीत सिंग नाव व टेलिकॉम रेग्युलेटरी ऍथॉरिटी येथून बोलत असल्याचे सांगणारा व्यक्ती, राकेश कुमार नाव सांगणारा उपनिरीक्षकपद सांगणारा व्यक्ती, मोहित रैना नाव सांगणारा व सीबीआयचा अधिकारी पद सांगणारा व्यक्ती यांच्यावर गुन्हा दाखल झाला आहे. आरोपीने फिर्यादी यांच्या मोबाईलवर फोन करून टेलिग्राम ऍथॉरिटी ऑफ इंडिया, नवी दिल्ली येथून बोलत असल्याचे सांगितले. फिर्यादीचे नावे असलेला मोबाईल नंबर दिल्ली येथे रजिस्टर असून त्यावर बेकायदा कारवाया झाल्याने फिर्याद दाखल असून, त्यामध्ये आरोपी आहात. या गुन्ह्यात ह्यूमन ट्रॅफिकिंग, चाइल्ड किडनॅपिंगचे आरोप असल्याचे सांगितले. फिर्यादीचा कॉल सायबर सेलच्या संबंधित असल्याचे सांगून फिर्यादीला व्हाट्सअप ऑडिओ, व्हिडिओ फोन कॉल करीत हे प्रकरण मिटविण्यासाठी वेळोवेळी वेगवेगळ्या बँक खात्यावर आरटीजीएसद्वारे पैशांची मागणी करून २२ लाख ८५ हजार रुपयांची फसवणूक केली.

दारू भट्टीवर छापा
टाकून मुद्देमाल जप्त
पिंपरी : शिरगाव पोलिसांनी दारू भट्टीवर छापा टाकून हातभट्टी दारू तयार करण्यासाठी लागणारा साडेतीन लाखांचा मुद्देमाल जप्त केला. ही कारवाई शिरगावच्या हद्दीत पवना नदीकाठी करण्यात आली. याप्रकरणी राहुल जीवन मन्नावत (वय ३१, रा. शिरगाव) याच्यावर गुन्हा दाखल झाला आहे. आरोपीने हातभट्टी दारू तयार करण्यासाठी लागणारे दहा हजार लिटर गूळ मिश्रित कच्चे रसायन भिजत घातले होते. येथे पोलिसांनी कारवाई करून साडेतीन लाखांचा माल जप्त केला. आरोपीला पोलिस आल्याची चाहूल लागताच तो पसार झाला.