शहरातील पुलांचे स्‍थापत्‍य विभागाकडून होणार ऑडिट

पिंपरी, ता. २५ : शहरातील मुख्य रस्ते आणि नदीवरील पुलांचे आयुष्यमान तपासण्यासाठी महापालिकेच्या स्थापत्य विभागाकडून सर्व पुलांचे स्ट्रक्चरल ऑडिट करण्यात येणार आहे. वाढत्या वाहतुकीमुळे हे पूल धोकादायक झाले आहेत का, हे तपासण्यासाठी मोहीम हाती घेण्यात आली आहे.
शहरात पवना, इंद्रायणी आणि मुळा या नद्यांवर तसेच प्रमुख रस्त्यांवर उड्डाण पूल बांधण्यात आले आहेत. या पुलांवर हजारो वाहने धावत असल्याने त्यांच्या सुरक्षिततेचा आढावा घेणे गरजेचे झाले आहे. त्यासाठी स्थापत्य विभागाने २१ जुलै रोजी निविदा प्रक्रिया राबवून सल्लागार कंपन्यांकडून दर मागवले होते. या निविदेत सहा सल्लागारांनी सहभाग घेतला होता. २९ जुलै रोजी अतिरिक्त आयुक्त विजयकुमार खोराटे यांच्या उपस्थितीत सल्लागारांनी सादरीकरण केले. त्यानंतर तांत्रिक प्रस्तावांच्या चाचणीनंतर पात्र ठरलेल्या तीन सल्लागारांमधून एका कंपनीची निवड करण्यात आली आहे.
या कामास आयुक्त तथा प्रशासक श्रावण हर्डीकर यांनी स्थायी समितीमार्फत मंजुरी दिली असून, लवकरच शहरातील सर्व पुलांची तपासणी सुरू होणार आहे. या ऑडिटमुळे कोणते पूल दुरुस्ती योग्य आहेत आणि कोणते पूर्णपणे बदलावे लागतील, याचा अहवाल तयार होईल.