पिंपळे गुरव परिसरातील जिजाऊ उद्यानाची दुरवस्था

सकाळ वृत्तसेवा
पिंपरी, ता. १ ः पिंपळे गुरव येथील राजमाता जिजाऊ उद्यानाच्या वाहनतळामध्ये चहाचे कप, प्लास्टिक पिशव्या पसरलेल्या आहेत. उद्यानातील कचरा उचलला जातो, परंतु वाहनतळासह अडगळीतला कचरा उचलला जात नाही. त्यामुळे कचऱ्याचे ढीग जमा झाले आहेत. या परिसरातील नागरिक दररोज सकाळी आणि सायंकाळी या उद्यानात येतात. यामध्ये ज्येष्ठ आणि महिलांची संख्या जास्त आहे. उद्यानात व्यायामासाठी खुल्या व्यायामशाळेचे साहित्यही बसविण्यात आले आहे, मात्र ते गेल्या काही महिन्यांपासून नादुरुस्त झाले आहे. हे साहित्य दुरुस्त करण्याची आणि कचरा उचलण्याची मागणी नागरिकांनी केली आहे.
याविषयी स्थानिक नागरिक शशिकांत कदम यांनी सांगितले की, मी दररोज सकाळी उद्यानात जातो. उद्यानात भटके श्वानही फिरत असतात. ते अनेकदा अंगावर येतात. संरक्षक भिंत उंच असूनही मुख्य दरवाजातून भटके श्वान आत येतात. त्यामुळे महापालिकेच्या उद्यान विभागाच्या वरिष्ठ अधिकाऱ्यांनी जबाबदारीने लक्ष घालण्याची गरज आहे.
---