तरुणीसह महिला पोलिसांना मारहाण

पिंपरी, ता. १ : वयाने दहा वर्षे मोठ्या मुलासोबत जबरदस्तीने होणाऱ्या लग्नास तरुणीने नकार दिला. याबाबत तक्रार देण्यासाठी संबंधित तरुणी पोलिस ठाण्यात गेली. त्यावेळी तिच्या आई आणि मावशीने पोलिस ठाण्यात गोंधळ घातला. तेथे तरुणीसह महिला पोलिस अंमलदारांनाही मारहाण केली. हा प्रकार संत तुकारामनगर पोलिस ठाण्यात घडला.

या प्रकरणी एका पोलिस अंमलदार महिलेने फिर्याद दिली आहे. त्यानुसार पोलिसांनी फिर्यादीची आई सुजाता व मावशी सुप्रिया (नावे बदललेली आहेत) यांना अटक केली आहे. सुजाता हिची मुलगी राणी (नाव बदललेले आहे) पोलिस ठाण्यात आली. तिची आई, मावशी तिच्या इच्छेविरुद्ध लग्न लावून देत असल्याची तक्रार दिली. त्यानुसार पोलिसांनी आईला ठाण्यात बोलवले असता आई व मावशी तेथे आल्या. त्यांनी राणीला शिवीगाळ, मारहाण करत जिवे मारण्याची धमकी दिली. त्यावेळी राणीचा बचाव करण्यासाठी तेथे असलेल्या फिर्यादी अंमलदार गेल्या असता, आरोपी महिलांनी त्यांना मारहाण केली. तसेच मदतीस आलेल्या इतर महिला अंमलदार यांनाही शिवीगाळ करून धक्काबुक्की केली.