हिंजवडीत प्रेमप्रकरणातून तरुणीवर कोयत्याने वार

पिंपरी, ता. १ : प्रेमप्रकरणातून झालेल्या वादात एका तरुणाने साथीदारांसह तरुणीवर कोयत्याने वार केले. यात तरुणी गंभीर जखमी झाली. शनिवारी (ता. १) सायंकाळी चारच्या सुमारास हिंजवडी येथील एका पेट्रोल पंपाजवळ हा प्रकार घडला. याप्रकरणी पोलिसांनी मुख्य संशयित योगेश भालेराव (वय २५), प्रेम लक्ष्मण वाघमारे (वय २०) व एका अल्पवयीन मुलाला ताब्यात घेतले. जखमी तरुणी शिक्षण घेते. ती आई आणि बहीणीसह राहते. तिची योगेशशी सोशल मीडियावरून ओळख झाली होती. ओळखीचे रूपांतर प्रेमात झाले, मात्र काही दिवसांपूर्वीच योगेशने दुसऱ्या तरुणीशी लग्न केले. यावरून दोघांमध्ये वारंवार वाद होत होते. शनिवारीही वाद होताच योगेशने साथीदारांसह तरुणीच्या डोके, मान व हातावर वार केले. या तरुणीवर हिंजवडीतील खासगी रुग्णालयात उपचार सुरु आहेत.
-----------------