खानावळी, हॉटेलांमधून अवैध दारु विक्री

चिखली, ता. २० : चिखलीतील मोरे वस्ती, मेहेत्रे वस्ती, ताम्हाणे वस्ती आदी परिसरात काही खानावळ, छोट्या हॉटेलमधून अवैधरीत्या मोठ्या प्रमाणावर दारू विक्री करण्यात येत आहे. त्यांच्यातील भांडणे आणि छेडछाडीच्या संभाव्य धोक्याने लहान मुले, मुली आणि महिलांसह अन्य नागरिकांमध्ये असुरक्षेचे वातावरण निर्माण झाले आहे. त्यामुळे, अवैध दारूधंदे त्वरित कायमस्वरुपी बंद करावेत, अशी मागणी परिसरातील नागरिक करत आहेत.
चिखलीतील मोरे वस्ती, मेहेत्रे वस्ती, ताम्हणे वस्ती परिसरात मोठ्या प्रमाणात बांधकाम कामगार तसेच औद्योगिक परिसरातील कामगार मोठ्या प्रमाणात राहत आहेत. हे कामगार जेवणासाठी परिसरातील हॉटेलमध्ये जातात. त्यावेळी कामगारांना जेवणाबरोबरच गावठी दारूची विक्री केली जाते. दारू पिल्यानंतर हे तळीराम परिसरात फिरत महिलांकडे पाहून सारखे बडबडत राहतात. त्यामुळे महिला आणि मुलींच्या मनामध्ये असुरक्षेची भावना निर्माण होत आहे. अनेक तरुण काम धंदा सोडून व्यसनाधीनतेकडे वळत असून इतर परिसरातील अनोळखी नागरिक आणि तरुण गावठी दारू पिण्यासाठी परिसरात येतात. त्यामुळे, तळीरामांमध्ये आपसापसात अनेक वेळा भांडणे होतात. त्याचा या परिसरातील नागरिकांवर वाईट परिणाम होतो. याबाबत पोलिसांना सांगितल्यानंतर तात्पुरती कारवाई केली जाते. परंतु काही दिवसांत पुन्हा अवैध दारू विक्री सुरू होऊन जैसे थे परिस्थिती निर्माण होत आहे. त्यामुळे अवैध दारू विक्री करणाऱ्या हातभट्टी चालकांवर कडक कारवाई करून हा प्रकार थांबवावा अशी मागणी करण्यात येत आहे.

अवैध धंदे आणि अवैध दारू विक्री करणाऱ्या विरोधात यापूर्वीच धडक कारवाई करण्यात आलेली आहे. जर पुन्हा असे प्रकार होत असल्यास नागरिकांनी सरळ पोलिसांशी संपर्क साधावा.
- विठ्ठल साळुंखे, वरिष्ठ पोलिस निरीक्षक, चिखली पोलिस ठाणे

मोरे वस्ती परिसरात अवैधरीत्या हातभट्टी दारूची विक्री केली जाते. याबाबत पोलिस प्रशासनाकडे तक्रार करण्यात आली आहे. मात्र पोलिस प्रशासनाने तात्पुरत्या स्वरूपात कारवाई न करता कायमस्वरूपी कारवाई करून अवैध धंदे बंद करावेत.
- विजय जरे, सामाजिक कार्यकर्ते