कामगार प्रतिनिधींच्या बैठकीदरम्यान वाद

पिंपरी, ता. २० ः नामांकित कंपनीच्या युनियन कार्यालयात कामगार प्रतिनिधींच्या बैठकीदरम्यान एकाला मारहाण करून अंगावर कचरा फेकला. याबाबत एमआयडीसी भोसरी पोलिस ठाण्यात गुन्हा दाखल आहे. विनोद विठ्ठल खुरंगळे (रा. यशवंतनगर, पिंपरी) यांनी फिर्याद दिली आहे. राजेंद्र पाटील, विक्रम वर्पे, चेतन बालवडकर आणि रितेश पिसाळ यांच्याविरुद्ध अ‍ॅट्रॉसिटीचा गुन्हा दाखल आहे. वरिष्ठ पोलिस निरीक्षक गणेश जामदार यांनी दिलेल्या माहितीनुसार, कंपनीतील कामगार संघटनेच्या कार्यालयात प्रतिनिधींची बैठक सुरू होती. त्यावेळी ‘युनियनमध्ये खूप कचरा झाला आहे, तो साफ केला पाहिजे,’ असे म्हणून बाहेर कचऱ्याने भरलेली बादली (डस्टबिन) आणून फिर्यादीच्या अंगावर टाकली आणि मारहाण करून शिवीगाळ केल्याचा आरोप पाटील यांच्यावर आहे. तर वर्पे व बालवडकर यांनी हाताने मारहाण करून पिसाळ यांनी फिर्यादीच्या डोक्यात स्टीलची पाण्याची बाटली मारून जखमी केल्याचा आरोप आहे.