गणेशोत्सवात ‘डीजे’चा आवाज बंद

तळेगाव दाभाडे, ता. २० : ‘‘या वर्षी गणेशोत्सवात डीजेला परवानगी नाकारण्यात आली आहे. कोणत्याही मंडळाने पैसे भरून डीजे बुक करू नये. डीजे लावण्यासाठी कोणीही फोन करू नये. कोणी डीजे लावून नियमभंग केला, तर कायदेशीर कारवाई केली जाईल,’’ असा ईशारा तळेगाव दाभाडे पोलिस ठाण्याचे वरिष्ठ पोलिस निरीक्षक कन्हैया थोरात यांनी दिला आहे.

आगामी गणेशोत्सव, नियमावली, कायदा व सुव्यवस्था यासह सुरक्षेच्या पार्श्वभूमीवर पोलिस ठाण्याच्या वतीने शनिवारी (ता.१९) सुशीला मंगल कार्यालयात बैठक पार पडली. यावेळी माजी नगराध्यक्ष मीरा फल्ले, उपनराध्यक्ष वैशाली दाभाडे, सहाय्यक पोलिस निरीक्षक प्रमिला क्षीरसागर, सुरेश यमगर, उपनिरीक्षक भरत वारे, जयंत कदम, अरूण माने यांच्यासह  सार्वजनिक गणेशोत्सव मंडळाचे पदाधिकारी, सामाजिक कार्यकर्ते, विविध संघटनेचे पदाधिकारी आणि नागरिक उपस्थित होते.

थोरात म्हणाले, ‘‘या वर्षी नवीन गणेश मंडळांनी श्रींच्या पर्यावरणपूरक मूर्तीची स्थापना करावी. नगरपरिषद, पोलिसांची परवानगी घेऊन नियमानुसारच मंडपउभारणी करावी. समाजोपयोगी कार्यक्रम राबविण्यास भर द्यावा. गणेश विसर्जन मिरवणूक ठरून दिलेल्या वेळेत काढून वेळेतच विसर्जन करावे.’’

गणेशोत्सवासाठी यावर्षी नवीन मंडळांना परवानगी दिली जाणार नाही. डीजे नियमांचे उल्लंघन केल्यास डीजे आणि संबंधित यंत्रणा जप्त करून कारवाई केली जाईल. मंडळांसह नागरिकांनी पोलिसांनी सहकार्य करावे.
- कन्हैया थोरात, वरिष्ठ पोलिस निरीक्षक, तळेगाव दाभाडे.