तीन वारकऱ्यांना उपचारानंतर सोडले

तळेगाव दाभाडे, ता. १२ ः कामशेत परिसरात मंगळवारी सकाळी कार्तिकी वारीच्या दिंडीत कंटेनर घुसून जखमी झालेल्या वारकऱ्यांपैकी तिघांना उपचारानंतर घरी सोडण्यात आले. उर्वरित सात वारकऱ्यांची प्रकृती सुधारत आहे, अशी माहिती डॉ. विकेश मुथा यांनी दिली. या दुर्घटनेत एका महिला वारकऱ्याचा मृत्यू झाला होता. जखमींपैकी दत्तात्रय विष्णू घरत, शारदा ठाकूर आणि प्रभाकर तांडेल यांना घरी सोडण्यात आले. कंटेनर चालक चंद्रशेखर रमाकांत सिंग (वय २४) याच्यावर पोलिसांनी सदोष मनुष्यवधाचा गुन्हा दाखल केला. न्यायालयाने त्याला १४ नोव्हेंबरपर्यंत पोलिस कोठडी दिली. याप्रकरणी कामशेत पोलिस ठाण्याचे पोलिस निरीक्षक शंकर पाटील यांच्या मार्गदर्शनाखाली पोलिस उपनिरीक्षक बालाजी लोसरवार तपास करत आहेत.
----