टॅंकरच्या धडकेने दुचाकीस्वार ठार

तळेगाव स्टेशन, ता. १० : तळेगाव-चाकण महामार्गावर शुक्रवारी (ता. १०) सकाळी पावणेनऊला टॅंकरची पाठीमागून धडक
बसल्याने दुचाकीस्वार जागीच ठार झाला. सुदवडी हद्दीत हा अपघात घडला. मुंबईहून चाकणकडे भरधाव जाणाऱ्या टॅंकरने (क्र. एमएच १३ डीक्यू-२१००) तळेगावहून चाकण एमआयडीसीकडे जाणाऱ्या दुचाकीला (क्र. एमएच-१९ डीडी-९३५३) पाठीमागून धडक दिली. चाक डोक्यावरून गेल्याने संतोष दादाराव सुरवाडे (वय- ३३, रा. तळेगाव स्टेशन) या दुचाकीस्वाराचा जागीच मृत्यू झाला. याप्रकरणी टॅंकरचालक रामनारायण रतन यादव (रा. कल्याण पूर्व) याच्या विरोधात तळेगाव एमआयडीसी पोलिस ठाण्यात गुन्हा दाखल करण्यात आला आहे.