श्री डोळसनाथ महाराज जन्मोत्सवानिमित्त हरिनाम सप्ताह

तळेगाव स्टेशन, ता. १ : तळेगाव दाभाडेचे ग्रामदैवत श्री डोळसनाथ महाराज जन्मोत्सव सोहळ्यानिमित्त सहा ते १२ नोव्हेंबरदरम्यान अखंड हरिनाम सप्ताहाचे आयोजन करण्यात आले आहे. तत्पूर्वी बुधवारी (ता.५) सायंकाळी सहा वाजता मंदिरात त्रिपुरारी पौर्णिमेनिमित्त दीपोत्सव साजरा केला जाणार आहे.
सप्ताहादरम्यान पहाटे पाच ते सात वाजेदरम्यान अभिषेक, महापूजा व काकडा आरती, सकाळी १० ते १ वाजेदरम्यान ज्ञानेश्वरी पारायण, सायंकाळी साडेचार ते साडेपाच दरम्यान श्री डोळसनाथ महिला मंडळाचा हरिपाठ आणि कालभैरवाष्टक होईल. सायंकाळी सव्वासहाला आरती आणि सात वाजता दीपमाळ प्रज्वलन होईल. रोज सायंकाळी ७ ते ९ वाजेपर्यंत अनुक्रमे बाळकृष्ण महाराज कोंडे, तुषार महाराज दळवी, संतोष महाराज काळोखे, विष्णू महाराज खांडेभराड, आसाराम महाराज बढे, ज्ञानेश्वर महाराज थोरात आदींचे हरिकिर्तन होणार आहेत. त्यानंतर महाप्रसादाचे वाटप होईल. १२ ऑक्टोबरला मावळ दिंडीचे आगमन आणि गणेश महाराज भगत यांचे हरिकीर्तन होईल. त्यानंतर रात्री १० ते १२:३० दरम्यान जन्माचे कीर्तन होणार आहे. गुरुवारी (ता.१३) सायंकाळी ढोल ताशांच्या गजरात श्री डोळसनाथ महाराज छबिना-पालखी मिरवणूक निघणार आहे.