Crime News : जादा परताव्याच्या आमिषाने व्यावसायिकांची १४ कोटींची फसवणूक
पुणे : कृषी उद्योगात गुंतवणूक केल्यास जादा परतावा मिळेल, असे आमिष दाखवून व्यावसायिकांची सुमारे १४ कोटी रुपयांची फसवणूक केल्याचा प्रकार समोर आला आहे. प्राथमिक तपासात २४ व्यावसायिकांना गंडा घातल्याचे निष्पन्न झाले आहे.
या प्रकरणी अकोला येथील एका ६३ वर्षीय व्यावसायिकाने फिर्याद दिली आहे. त्यावरून चतु:शृंगी पोलिस ठाण्यात गुन्हा दाखल केला आहे. या गुन्ह्याचा तपास आर्थिक गुन्हे शाखेकडे सोपविण्यात आला आहे.
या संदर्भात प्रशांत झाडे (रा. अंबरनाथ, जि. ठाणे), रोहन मताले, संदेश गणपत खामकर (रा. ठाणे), जयंत रामचंद्र बांदेकर (रा. बोरिवली पश्चिम, मुंबई), कमलेश महादेवराव ओझे (रा. कळवा, जि. ठाणे) आणि बाणेर येथील ए. एस. ॲग्री अँड ॲक्वा एलएलपी कंपनीविरुद्ध गुन्हा दाखल करण्यात आला आहे.
वरिष्ठ पोलिस निरीक्षक बालाजी पांढरे यांनी दिलेल्या माहितीनुसार, आरोपींनी संगनमत करून काही व्यावसायिकांना कृषी उद्योगात गुंतवणूक केल्यास जादा परताव्याचे देण्याचे आमिष दाखवले. आधुनिक तंत्रज्ञानाच्या मदतीने हळदीचे उत्पादन घेणार आहोत.
कृषी उत्पादनात ही कंपनी अव्वल असल्याची बतावणी करून त्यांनी गुंतवणूकदारांकडून १३ कोटी ८२ लाख ८७ हजार रुपये घेतले. परंतु त्यांना परतावा आणि मुद्दलही परत केले नाही. सन २०१९ पासन हा प्रकार सुरू होता.
फिर्यादीने आरोपींकडे गुंतवणूक करण्यासाठी मोठी रक्कम दिली. परंतु प्रकल्पाबाबत विचारणा केल्यानंतर आरोपींनी त्यांना उडवाउडवीची उत्तरे दिली. तपासादरम्यान आरोपींनी अशा प्रकारे इतर २३ व्यावसायिक आणि शेतकऱ्यांची फसवणूक केल्याचे समोर आले आहे. पुढील तपास आर्थिक गुन्हे शाखेचे पोलिस निरीक्षक अशोक कदम करीत आहेत.
हे ही वाचा
