पुणे जिल्ह्यात ३६ गावांत टॅंकर सुरू

पुणे - पुणे विभागातील ५४ गावे आणि ३४२ वाड्यांना यंदाच्या उन्हाळ्यात पाणीटंचाईची झळ बसली आहे. या गावांमधील एकूण एक लाख २३ हजार ४७६ लोकसंख्येला सध्या टॅंकरद्वारे पिण्याच्या पाण्याचा पुरवठा करण्यात येत आहे. पुणे, सांगली आणि सातारा या तीन जिल्ह्यातील गावांचा यात समावेश आहे. आतापर्यंत कायम दुष्काळी जिल्हा म्हणून ओळखला जाणारा सोलापूर आणि बागायती क्षेत्र असलेला कोल्हापूर, या दोन जिल्ह्यांत अद्यापपर्यंत एकही टॅंकर सुरु झालेला नाही. त्यामुळे हे जिल्हे आता टॅंकरमुक्त म्हणून ओळखले जाऊ लागले आहेत.

विभागातील पुणे जिल्ह्यात सध्या सर्वाधिक ५४ टॅंकर सुरु असून त्या माध्यमातून ३६ गावे आणि २५३ वाड्यांना पाण्याचा पुरवठा केला जात आहे. जिल्ह्यातील ९६ हजार ३८० लोकसंख्या ही टॅंकरच्या पाण्यावर अवलंबून आहे. विभागातील बारा तालुक्यांतील टंचाईग्रस्त गावांना सध्या २५ सरकारी आणि ४५ खासगी टॅंकरद्वारे पाणी पुरवठा करण्यात येत आहे. पाणीटंचाईमुळे १ हजार ८६९ पशुधनाला पिण्याच्या पाण्याची झळ सोसावी लागत आहे. या गावांना पाणी पुरवठा करण्यासाठी ७२ खासगी विहीरी व विंधनविहिरींचे अधिगृहण करण्यात आल्याची माहिती विभागीय आयुक्त कार्यालयाच्यावतीने देण्यात आली.

पुण्यातील सहा तालुके टॅंकरमुक्त

यंदाच्या उन्हाळ्यात आतापर्यंत पुणे जिल्ह्यातील सहा तालुक्यांत एकही टॅंकर सुरु झालेला नाही. त्यामुळे हे तालुके सध्या तरी टँकरमुक्त तालुके म्हणून ओळखले जाऊ लागले आहेत. विशेष म्हणजे या तालुक्यांत गेल्या काळात कायम टॅंकर सुरू असणाऱ्या इंदापूर व दौंड या दोन तालुक्यांचा समावेश आहे. तसेच हवेली, मावळ, मुळशी व वेल्हे हे तालुकेही टॅंकरमुक्त झाले आहेत.

जिल्हा टॅंकर गावे वाड्या बाधित लोकसंख्या

पुणे ५४ ३६ २५३ ९६३८०

सातारा ०८ १० २९ ११४४५

सांगली ०८ ०८ ६० १५६५१

एकूण ७० ५४ ३४२ १२३४७६

या तालुक्यांत सुरू

आंबेगाव, बारामती, भोर, जुन्नर, खेड, पुरंदर, शिरूर (सर्व पुणे जिल्हा). माण, वाई, सातारा, कराड (सर्व सातारा जिल्हा) आणि जत (जिल्हा सांगली).