फुलांचा बाजार बहरला; झेंडूची 45 टन आवक | Diwali Festival 2019 News

 Diwali Festival 2019 : मार्केट यार्ड : दिवाळीच्या पार्श्वभूमीवर फूलबाजारात मोठी आवक सुरू झाली आहे. शुक्रवारी बाजारात 42 ते 45 टन झेंडूची, तर शेवंतीच्या फुलांची 20 टन आवक झाली. दिवाळीमुळे झेंडूच्या मागणीत वाढ झाली असली, तरी राज्यासह जिल्ह्याच्या काही भागांत सुरू असलेल्या पावसामुळे फुलांच्या गुणवत्तेवर मोठा परिणाम झाला आहे. त्यामुळे बाजारात दाखल होत असलेल्या ओल्या फुलांना कमी भाव मिळत आहे, अशी माहिती फूलबाजार अडते असोसिएशनचे अध्यक्ष अरुण वीर यांनी दिली. 

घाऊक बाजारात झेंडूला प्रतिकिलोस दर्जानुसार 10 ते 60 रुपये, तर शेवंतीच्या फुलांना 30 ते 100 रुपये भाव मिळत आहे. तसेच, किरकोळ बाजारात प्रतिकिलो झेंडूला 40 ते 100 रुपयांपर्यंत भाव मिळत आहे. दिवाळीत धनत्रयोदशीपासून लक्ष्मीपूजन तसेच पाडव्यानिमित्त पूजेसाठी फुलांना मोठी मागणी असते. विशेषतः झेंडू, शेवंतीच्या फुलांना मोठी मागणी असते. त्यामुळे किरकोळ बाजारात झेंडूची चढ्या दराने विक्री होत आहे. 

बाजारात पुणे जिल्हा, धाराशीव, नगर, सातारा, वाई, सोलापूर भागातून झेंडूची मोठी आवक होते. तसेच बाजारातून मुंबई, ठाणे, कोकण भागात झेंडू विक्रीसाठी पाठविला जातो. आकर्षक रंग आणि आकाराने मोठ्या असलेल्या कोलकता झेंडूचा वापर तोरण तसेच सजावटीसाठी केला जातो. 

फूलविक्रेत्यांकडून झेंडूला चांगली मागणी आहे. झेंडूसह शेवंती, गुलछडी, लिली, गुलाब गड्डीला मागणी चांगली आहे. मात्र, फुले भिजलेली असल्याने खरेदीदारांकडून कमी प्रमाणात खरेदी केली जात आहे. उद्यापासून बाजारात फुलांची आवक मोठ्या प्रमाणात वाढणार असल्याची माहिती फुलाचे व्यापारी सागर भोसले यांनी दिली.