Crime News : लग्नाचे आमिष दाखवून तरुणीवर अत्याचार; दुसऱ्या तरुणीसोबत साखरपुडा

पुणे : लग्नाचे आमिष दाखवून जबरदस्तीने एका तरुणीसोबत शारीरिक संबंध ठेवत तिच्याकडून एक लाख रुपये घेतले. परंतु तिच्याशी लग्न न करता तरुणाने दुसऱ्याच तरुणीसोबत साखरपुडा करून धमकी दिल्याची घटना उघडकीस आली आहे.

याबाबत वडगाव शेरी येथील एका २३ वर्षीय तरुणीने फिर्याद दिली आहे. त्यावरून शुभम पायगुडे (रा. आगळंबे, ता. हवेली) यांच्यासह पाचजणांविरुध्द भारती विद्यापीठ पोलिस ठाण्यात गुन्हा दाखल केला आहे. पोलिसांनी दिलेल्या माहितीनुसार, आरोपी शुभम पायगुडे याने फिर्यादी तरुणीला लग्नाचे आमिष दाखविले.

कात्रज येथील एका हॉटेलमध्ये तरुणीसोबत जबरदस्तीने शारीरिक संबंध ठेवले. लग्न करण्याच्या बहाण्याने तिच्याकडून एक लाख रुपये घेतले. शुभमच्या भावाने त्या दोघांच्या प्रेमसंबंधाबाबत घरी सांगितले. तेव्हा शुभमच्या कुटुंबीयांनी फिर्यादी तरुणीला शिवीगाळ केली. तसेच, त्याचा दुसऱ्या तरुणीसोबत साखरपुडा केला. याचा जाब विचारण्यासाठी फिर्यादी तरुणी गेल्यानंतर तिला धमकी दिली, असे फिर्यादीत म्हटले आहे.