Accident News : पुणे - सोलापूर राष्ट्रीय महामार्गावर अपघात; दाेन मृत्यू, तीन जखमी

करकुंभ : पुणे - सोलापूर राष्ट्रीय महामार्गावर दौंड तालुक्यातील कुरकुंभ हद्दीत पुढे चाललेल्या मालट्रकला सोलापूरकडून भारधाव वेगात येणारी खाजगी आराम बस पाठीमागून धडकल्याने बसमधील गंभीर जखमी झालेल्या एक महिला व एक पुरूष प्रवाशाचा मृत्यू झाला. तर तीन प्रवाशी जखमी झाले असून सर्वजण सध्या पुणे शहराच्या परिसरात राहणारे आहेत. हा अपघात शनिवारी ( ता. ६ ) सकाळी झाला होता.

कुरकुंभ येथील औद्योगिक वसाहत कार्यालय चौकात शनिवारी ( ता.६ ) सकाळी पुणे - सोलापूर महामार्गावरून पुण्याकडे जाणार्या मालट्रकला पाठीमागून भरधाव वेगात येणार्या खाजगी आरामबसने ( युपी.७८,एफएन.९२५७ ) धडक दिली. या अपघातात बसमधील शोभा गुरूनाथ कलबंडे ( वय ४५, रा.शाहु काँलनी,वेदांन्त नगरी,गल्ली नं ११, कर्वेनगर पुणे-५२ मूळ रा.बडधळ ता.अफजलपुर जि गुलबर्गा कर्नाटक ) व महादेव सोपान भिसे ( वय-४५,रा. रामनगर चिंचवड पुणे ) हे दोघे गंभीर जखमी झाल्याने मृत्यू झाला.

तर राजश्री कल्याणराव मोरे ( वय-३९ सध्या रा. चिंचवडनगर पुणे. मूळ रा. उमरगा, जि उस्मानाबाद. ) आकाश दत्तात्रय पोकरकर ( वय २७, रा.कवठे यमाई ता.शिरूर जि पुणे. ), अनिल गुडाप्पा बडेगुर ( वय २५, रा.सुतारवाडी रोड,भवानीनगर,पाषाण पुणे ) व इतर काही जण किरकोळ व गंभीर जखमी झाले आहेत.

अपघातात बसचे पुढील बाजूचे नुकसान झाले आहे. यासंदर्भात गुरूनाथ चन्नाअप्पा कलबंडे यांनी फिर्याद दिली आहे. याप्रकरणी बसचालक सलीम महेबूब सडकवाला ( रा.कासार शिरसी, ता.निलंगा जि लातूर ) याने ताब्यातील बस निष्काळजीपणे भरधाव वेगात चालवून समोरील अज्ञात मालट्रकला धडक देऊन अपघात करून प्रवाशाच्या मृत्यू व जखमी होण्यास कारणीभूत ठरला. त्यामुळे चालकाविरूध भारतीय दंड संहिता कलम 304 अंतर्गत गुन्हा दाखल करण्यात आला आहे. अपघाताचा पुढील तपास पोलिस निरीक्षक भाऊसाहेब पाटील यांच्या मार्गदर्शनखाली उपनिरीक्षक राठोड करीत आहेत.