बेकायदा उत्खननाला बसणार आळा; चार विभागातील अधिकाऱ्यांकडून धडक कारवाई सुरू

पुणे : कोरोनावर उपाययोजना करण्यात प्रशासन व्यस्त असताना लॉकडाउनच्या कालावधीत बेकायदा उत्खननाचे प्रमाण वाढले आहे. हे बेकायदा उत्खनन रोखण्यासाठी जिल्हा प्रशासनाकडून 'ऍक्‍शन प्लॅन' तयार करण्यात आला आहे. महसूल विभागासह पोलिस, वन विभाग आणि प्रादेशिक परिवहन कार्यालय यांच्या संयुक्त पथकांद्वारे बेकायदा उत्खनन करणाऱ्यांवर कठोर कारवाई करण्यात येणार आहे. 

- पेपर देता आला नाही? टेन्शन घेऊ नका; पुणे विद्यापीठ घेणार 'स्पेशल परीक्षा'!​

जिल्हा प्रशासनातील खनिकर्म विभागाच्या कामकाजाचा आढावा घेण्यात आला. या बैठकीस जिल्हाधिकारी डॉ. राजेश देशमुख, अतिरिक्त जिल्हाधिकारी विजयसिंह देशमुख, पोलिस अधीक्षक अभिनव देशमुख यांच्यासह अन्य अधिकारी उपस्थित होते. या बैठकीत बेकायदा उत्खनन रोखण्यासाठी कृती आराखडा तयार करण्यात आला आहे. संबंधित विभागाची एकत्रित मदत घेऊन ही कारवाई करण्यात येणार आहे. 

- कर्ज मंजूर करतो म्हणाला अन् पावणे चार लाख रुपये लुटून गेला!​

अतिरिक्त जिल्हाधिकारी विजयसिंह देशमुख म्हणाले, बेकायदा उत्खनन रोखण्यासाठी संयुक्त पथक स्थापन करण्याचा निर्णय घेण्यात आला आहे. या पथकांमध्ये महसूल विभागाबरोबरच पोलिस, वन आणि आरटीओ विभागाचे अधिकारी-कर्मचाऱ्यांचा समावेश असेल. ज्या भागात बेकायदा उत्खनन सुरू आहे, अशा भागाची पाहणी करून संयुक्‍त कारवाई करण्यात येईल. त्यामुळे बेकायदा उत्खनन करणाऱ्यांवर चाप बसणार आहे. 

वाळू तस्करांच्या 24 यांत्रिक बोटी उध्वस्त 
जिल्ह्यातील दौंड तालुक्‍यात बोटींद्वारे बेकायदा वाळू उपसा सुरू असल्याची माहिती प्रशासनाला मिळाली. त्यानुसार दौंडमधील शिरपूर येथे 13 बोटी आणि धुमाळ फाटा, आलेगाव आणि देवळगाव या ठिकाणी 11 बोटी ताब्यात घेण्यात आल्या. या सर्व 24 बोटी नष्ट करण्यात आल्या आहेत. बेकायदा उत्खनन आणि वाळू चोरींचे प्रकार घडू नयेत, यासाठी या पथकांकडून कारवाई सुरू राहील, अशी माहिती देशमुख यांनी दिली.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)