अतिरिक्त सचिवांचा अपघातात मृत्यू

पुणे - मंत्रालयातील अतिरिक्त सचिव सुहास चव्हाण (वय ४९, रा. चेंबूर, मुंबई) यांचा हडपसरजवळील मंतरवाडी चौकात रविवारी रात्री आठच्या सुमारास झालेल्या अपघातात मृत्यू झाला. ते दुचाकीवरून जात असताना हा अपघात झाल्याची माहिती हडपसर पोलिसांनी दिली. 

पोलिसांनी दिलेल्या माहितीनुसार, चव्हाण हे कात्रजवरून मंतरवाडीच्या दिशेने मोटारसायकलवरून जात होते. त्यावेळी समोरून आलेल्या खासगी बसने त्यांना धडक दिली. त्यात चव्हाण हे गंभीर जखमी झाले. अपघाताची माहिती पोलिसांना कळताच त्यांनी तातडीने घटनास्थळी धाव घेतली. त्यांनी चव्हाण यांना १०८ या आपत्कालीन वैद्यकीय रुग्णवाहिकेतून उपचारासाठी ससून रुग्णालयात दाखल केले. पण, उपचारापूर्वीच त्यांचा मृत्यू झाल्याची माहिती डॉक्‍टरांनी पोलिसांना दिली. चव्हाण यांचा मृतदेह शवविच्छेदनासाठी पाठविण्यात आला आहे.