बारामतीकरांच्या कोरोना लढ्याला सलाम

बारामतीकरांच्या कोरोना लढ्याला सलाम

बारामती (पुणे) : एकीकडे कोरोनाचे संकट बारामतीवर अधिकच गडद होत असताना दुसरीकडे सामाजिक संस्था या संकटावर मात करण्यासाठी पुढाकार घेऊ लागल्या आहेत. शहरातील नाट्य क्षेत्रात कार्यरत नटराज नाट्य कला मंडळाने इंदापूर रस्त्यावरील डॉ. बाबासाहेब आंबेडकर विद्यार्थी वसतिगृहात सुरु केलेले 100 खाटांच्या क्षमतेचे लोकसहभागातील पहिले कोविड केअर सेंटर चारच दिवसात भरून गेले. त्यामुळे नटराजने नव्याने दुसरे कोविड केअर सेंटर सुरू करण्याचा निर्णय घेतला आहे. 

याबाबत नटराज मंडळाचे अध्यक्ष व नगरसेवक किरण गुजर यांनी माहिती दिली की, विद्या प्रतिष्ठानच्या पाठीमागील बाजूस असलेल्या तारांगण या महिला वसतिगृहात कोविड केअर सेंटर सुरु करण्याचा निर्णय घेण्यात आला आहे. या वसतिगृहात देखील 100 खाटांची क्षमता करण्यात आली आहे. लक्षणे नसलेले पण कोरोना पॉझिटिव्ह रुग्ण या ठिकाणी ठेवण्यात येणार आहेत. चौदा दिवस या रुग्णांवर येथे उपचार होतील व रुग्ण पुन्हा घरी जातील. शासकीय यंत्रणेला कोविड केअर सेंटर चालविण्यासाठी लोकसहभागातून मदत करणे, असा या मागचा उद्देश आहे. या सेंटरचे व्यवस्थापन नटराज नाट्य कला मंडळ पाहणार असून, वैद्यकीय उपचार, तपासणी, रुग्ण दाखल करणे या बाबी आरोग्य विभागाच्या वतीने केल्या जाणार आहेत. नटराजचे कार्यकर्ते जेवण, चहा, नाश्ता, करमणुकीची सोय व रुग्णांना इतर सुविधांचे नियोजन करतील. 

वास्तविक दुसरे कोविड केअर सेंटर सुरू करावे लागणे, ही तशी चांगली बाब म्हणता येणार नाही, पण परिस्थिती गंभीर बनत असल्याने रुग्णांची चांगली सोय करण्याच्या उद्देशाने आम्ही प्रयत्न करीत आहोत. लवकरात लवकर यावर नियंत्रण मिळविण्याचा प्रयत्न आरोग्य विभाग व प्रशासन करीत असून परिस्थिती लवकरच नियंत्रणात येईल. 
- किरण गुजर, अध्यक्ष, नटराज नाट्य कला मंडळ 
 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com