आमचा किल्ला लय भारी

पुणे - सारसबागेसमोरील गरवारे बालभवनमध्ये मुलांनी उभारलेले किल्ले बघायला पालक आणि पाहुणे उत्सुकतेनं जमले होते. किल्ला करण्यासाठी काय काय केलं, हे मुलं त्यांना सांगत होती. त्यांच्याकडून होणाऱ्या कौतुकानं ती आनंदित होत होती.

वरद आणि चिंतन म्हणाले, ‘‘बालभवनमध्ये सगळ्या गटांनी मिळून तीन किल्ले बनवले आहेत. गटामध्ये ताईंनी सगळ्यांशी आधी गप्पा मारल्या. आमच्या आधीच्या मुलांनी किल्ला बनवताना कुठला विचार केला होता, ते कसं नियोजन करायचे, कुठलं साहित्य वापरायचे वगैरे सांगितलं. आम्हाला काय करायला आवडेल ते विचारलं.’’ 

जानकी, आदित्य, मल्हार व अनन्या यांनी सांगितलं, की दोन आठवडे आधी आम्ही किल्ल्याचं काम सुरू केलं. तळाशी पिंपं, त्याच्यावर मोठाले दगड, वरून गोणपाट टाकले. मग चिखलानं वर हवा तसा आकार दिला. रस्ते, दऱ्या, विहिरी, झाडी आणि पाणी दाखवलं. हे करताना भारी वाटलं. छत्रपती शिवाजी महाराजांच्या काळात किल्ले कसे तयार करत असतील, याच्यावरची माहिती आम्ही सुटीत वाचायची असं ठरवलं आहे. 

बालभवनमध्ये अनेक मुलांनी मजेदार चित्र काढून शुभेच्छापत्र तयार करायचा गमतीदार कारखानाच जणू उघडला होता. आहान, वेदांग व राधिका म्हणाले, की आम्ही तयार केलेली भेटकार्ड ताई दिवाळी समारंभासाठी बालभवनमध्ये येणाऱ्या पाहुण्यांना देतात. पाहुण्यांनी ‘वाहव्वा’ म्हटलं की आम्हाला सांगतात. सगळ्या ताई आपापल्या गटातल्या मुलांसाठी शुभेच्छापत्र तयार करून त्यावर त्या-त्या मुलाचं किंवा मुलीचं नाव लिहून देतात. आम्हाला मिळालेलं शुभेच्छापत्र आम्ही सगळ्यांना दाखवतो. नंतर बुकमार्क म्हणून वापरतो.