खडकवासला कालव्यात पोहण्यासाठी गेलेला मुलगा बुडाला

किरकटवाडी - खडकवासला धरणापासून सुमारे पाचशे मीटर अंतरावर कालव्यामध्ये पोहण्यासाठी गेलेला तेरा वर्षांचा मुलगा बुडाला असून पुणे महानगर प्रदेश विकास प्राधिकरणाच्या नांदेड सिटी अग्निशमन केंद्राचे जवान व हवेली पोलीसांकडून त्याचा शोध घेण्यात येत आहे. मयुर बापु मरगळे (वय-13, रा. गल्ली नं 8, शिवनगर, किरकटवाडी) असे बुडालेल्या मुलाचे नाव आहे.

दुपारी एक वाजण्याच्या सुमारास मयुर त्याच्या मित्रासह पोहण्यासाठी गेला होता. त्याला अजून नीट पोहता येत नव्हते. धरणापासून सुमारे पाचशे मीटर अंतरावर असलेल्या लोखंडी पुलाजळ मयुर पाण्यात उतरला व पाण्याचा अंदाज न आल्याने बुडाला. घाबरलेल्या मयुरच्या मित्राने ही माहिती मयुरच्या आजोबांना सांगितली व त्यानंतर हवेली पोलीस ठाण्याला ही माहिती देण्यात आली.

सहाय्यक फौजदार सुभाष गिरे यांनी तात्काळ नांदेड सिटी अग्निशमन केंद्राला याबाबत माहिती दिली. अग्निशमन केंद्र प्रमुख सुजित पाटील यांच्या मार्गदर्शनाखाली योगेश मायनाळे, शुभम मिरगुंडे, श्रीकांत आढाव, शरद माने, पंकज माळी, अक्षय काळे व अभिषेक गोणे हे जवान आणि पोलीस नाईक विश्वास मोरे हे मयुरचा शोध घेत आहेत.

उन्हाळी आवर्तन सुरू असल्याने पाण्याला वेग

सध्या खडकवासला धरणाच्या कालव्यातून हवेली, दौंड व इंदापूर या भागातील शेतीसाठी 1134 क्युसेकने उन्हाळी आवर्तन सुरू आहे. त्यामुळे कालव्यातून वेगाने पाणी वाहत आहे. पाण्याचा प्रवाह जास्त असल्याने शोधकार्य करण्यात अडथळा निर्माण होत आहे.