ब्रेक लायनर रिव्हेटिंग मशिनने पीएमपीचे काम होणार अचूक

पुणे - पीएमपीच्या गाड्यांना ब्रेक लायनर बसविण्यासाठी नॉरब्रेमसे या जर्मन कंपनीकडून अत्याधुनिक ब्रेक लायनर रिव्हेटिंग मशिन देण्यात आले आहे, त्यामुळे पीएमपीचे मनुष्यबळ वाचणार असून ब्रेक लायनर बसविण्याच्या कामामध्ये अचूकता येणार आहे.

सकाळचे मोबाईल अॅप्लिकेशन डाऊनलोड करण्यासाठी क्लिक करा

पीएमपीच्या १३ डेपोंमध्ये २६ कर्मचाऱ्यांच्या माध्यमातून गाड्यांची ब्रेक लायनरची कामे केली जात होती. हे काम हाताने होत असल्याने त्यामध्ये काही वेळेस त्रुटी राहत होत्या. मात्र, ब्रेक लायनर रिव्हेटिंग मशिन पीएमपीकडे दाखल झाल्याने हे काम लवकर आणि अचूकपणे होणार आहे. तसेच प्रशासनाचे मनुष्यबळदेखील वाचणार आहे. शनिवारी (ता. १७) पीएमपीच्या अध्यक्षा व व्यवस्थापकीय संचालिका नयना गुंडे यांच्या हस्ते हे मशिन कार्यान्वित करण्यात आले. त्याचबरोबर कंपनीकडून पीएमपीला एक वॉटर कूलर देण्यात आले. या वेळी कंपनीचे मुख्य वितरण व्यवस्थापक अरुण बिस्ट, पीएमपीचे अधिकारी विलास बांदल आदी उपस्थित होते. संबंधित कंपनीने पीएमपीच्या कर्मचाऱ्यांना मशिन चालविण्याचे प्रशिक्षण दिले.

कर्मचाऱ्यांना नवीन तंत्रज्ञानाविषयी माहिती असणे गरजेचे आहे. त्यांनी यंत्रणेतील बदल आत्मसात करण्याची गरज आहे.
- नयना गुंडे, अध्यक्ष व व्यवस्थापकीय संचालक, पीएमपी

मशिनचे फायदे
 गाड्यांचे ब्रेक फेलचे प्रमाण घटणार
 कामासाठी लागणाऱ्या मनुष्यबळामध्ये कपात होणार
 लायनरचे काम जलद व अचूक होणार