शिवनेरीचा गणेशोत्सव आठवणीत राहील असा साजरा करा : संदीप पाटील

शिवनेरी - शिवजन्मभूमी शिवनेरीचा गणेशोत्सव आमच्या आठवणीत राहिला पाहिजे असे काहीतरी करून दाखवा असे आवाहन पुणे ग्रामीणचे पोलीस अधीक्षक संदीप पाटील यांनी येथील गणेश मंडळाच्या कार्यकर्त्याना केले. पंचायत समितीच्या राजमाता जिजाऊ सभागृहात गणेश मंडळाचे अध्यक्ष, कार्यकर्ते, शांतता समिती सदस्य, पोलीस पाटील, तंटामुक्तिचे अध्यक्ष व नागरिक यांची बैठक झाली यावेळी ते बोलत होते

यावेळी नायब तहसीलदार वळवी, नगराध्यक्ष शाम पांडे, उपनगराध्यक्ष अलका फुलपगार, जिल्हा परिषद सदस्य देवराम लांडे, आशा बुचके, बाजार समिती सभापती संजय काळे आदी मान्यवर उपस्थित होते.

पाटील म्हणाले, सर्व मंडळाच्या अध्यक्षांनी चांगले काम करून आपल्या कार्याचा ठसा उमटविला पाहिजे. आपल्या गणेश मंडळास मार्गदर्शन करतील असे पाच शांतिदुत नेमावेत,पोलीस प्रशासनाकडून त्यांना प्रमाणपत्र देण्यात येईल. गणेश मंडळांनी आपल्या गावाचा व परिसराचा विकास करावा. जे कोणी डॉल्बी लावतील पुढील वर्षी त्या मंडळांना परवानगी मिळणार नाही. प्रत्येक मंडळांनी आपल्या वार्डात सीसीटीव्ही लावण्याचा प्रयत्न करावा. नगरपालिका ट्रॅफिक वार्डनची जबाबदारी घेऊ शकते त्यांना आम्ही ड्रेस देऊ तुम्ही मानधन देऊ शकता. त्यामुळे ट्रॅफिक चा प्रश्न मिटू शकतो.गणपती मंडळात महिलांचा सहभाग वाढवा.

पोलीस निरीक्षक यशवंत नलावडे म्हणाले, डॉल्बी व प्लास्टिक मुक्त उत्सव साजरा करा तसेच ध्वनी प्रदूषण होणार नाही याची काळजी घ्या. 
यावेळी तनिष्का व्यासपीठाच्या उज्वला शेवाळे, नगरसेवक फिरोज पठाण, भाऊ कुंभार, दिनेश दुबे,दीपक परदेशी, अलका फुलपगार, मधुकर काजळे, अकील शेख, देवराम लांडे, ज्ञानेश्वर काजळे, आदींनी सूचना मांडल्या.  

नगराध्यक्ष पांडे म्हणाले, मोकाट जनावरे, भटकी कुत्री, स्वच्छता व आरोग्य याबाबत प्रत्येक वर्षी नगरपालिका जबाबदारीने लक्ष देते. गणेशोत्सवातील सर्व कामे केली जातील. पोलिसांनी हस्तक्षेप करू नये यासाठी सर्व कार्यकर्त्यांनी स्वतःहून प्रयत्न करावेत. विलास कडलग यांनी सूत्रसंचलन केले.