नात्यातील महिलेला वाईट हेतूने खुणावलं; अपहरण करून तरुणाचा खून

पिरंगुट - नात्यातील महिलेला वाईट हेतूने खुणावल्याच्या संशयातून पिरंगुट (ता. मुळशी) येथील तरुणाने तीन साथीदारांच्या मदतीने एका तरुणाचे अपहरण करून खून केला. त्यानंतर त्याचा मृतदेह घोल (ता. वेल्हे) येथे नेऊन जाळण्यात आला.

याबाबत मिळालेली माहिती अशी की, राहुल काशिनाथ इंगवले (वय 32), असे खून झालेल्या तरुणाचे नाव आहे. याप्रकरणी आकाश विजय केदारी (वय 21, रा. पिरंगुट), विक्रम पंढरीनाथ जगताप (वय 21, रा. पिरंगुट), प्रमोद भीमराव कांबळे (वय 30, रा. कासार आंबोली) व शेखर बाळासाहेब केदारी (वय 23, रा. पिरंगुट), या संशयित आरोपींना पौड पोलिसांनी अटक केली. न्यायालयाने त्यांना सहा दिवसांची पोलिस कोठडी सुनावली आहे. याबाबत गीता दीपक इंगवले यांनी फिर्याद दिली.

पुण्यातील इतर बातम्या वाचण्यासाठी क्लिक करा

पोलिसांनी दिलेल्या माहितीनुसार, आकाश केदारी, शेखर केदारी, विक्रम जगताप व प्रमोद कांबळे यांनी राहुल याचे बुधवारी (ता. 24) सायंकाळी कासार आंबोली येथून मोटारीतून अपहरण केले. त्यानंतर त्याला कासार आंबोली येथील खडी मशिन परिसरात नेण्यात आले. त्याठिकाणी धारदार शस्त्रांनी वार करून त्याचा खून करण्यात आला. त्यानंतर त्याचा मृतदेह घोल येथे नेऊन जाळण्यात आला. पौड पोलिसांनी या गुन्ह्याचा तपास करून वरील चार आरोपींना अटक केली.

हे वाचा - नाना पेेठेतील टोळक्याची दहशत! दुकानात घुसून तरुणावर कोयत्याने वार

पौड पोलिस ठाण्याचे वरिष्ठ निरीक्षक अशोक धुमाळ यांच्या मार्गदर्शनाखाली सहाय्यक निरीक्षक विनायक देवकर, रवींद्र नागटिळक, जय पवार, अनिकेत सोनवणे, तुषार भोईटे आदींच्या पथकाने ही कारवाई केली आहे.