पावसाळ्याच्या तोंडावर नाला सफाईस दिरंगाई

महर्षी नगर - पावसाळा सुरू होण्यापूर्वी महापालिका दरवषी लाखो रुपयांचा निधी नालेसफाईसाठी खर्च करत असते, नैसर्गिक आपत्ती टाळण्यासाठी ही नालेसफाई शहरात सगळीकडे केली जाते, जुन्या प्रभाग क्रमांक २८ मधील मुकुंदनगर भागातील अनेक ठिकाणी नाला सफाईला दिरंगाई होत असल्याचे दिसते.

सदर नाला बिबवेवाडी मार्गे ऋतुराज सोसायटी, प्रेमनगर, महर्षी नगर, मुकुंद नगर मधून जातो, यामध्ये झाडी झुडपी वाढली असून थर्मोकोलचे तुकडे, विनावापर गादी, कपड्याचे ढीग अडथळे ठरू शकतात. पहिल्याच पावसात पाण्याच्या प्रवाहाला अडथळा निर्माण होण्याची शक्यता नाकारता येत नाही. गेल्या वर्षी महर्षी नगर चाळीतील अनेक घरांत नाल्यातील पाणी गेले होते.

नाल्याच्या सफाईची आवश्यकता आहे. नालेसफाई करण्या संदर्भातील पत्र महापालिका आयुक्त, अतिरिक्त आयुक्तांना देण्यात आले आहे. मलनिस्सारण विभागातील अधिकाऱ्यांना वारंवार संपर्क केल्यावरही प्रतिसाद मिळत नाही. गेल्या वर्षी अनेक नागरिकांच्या घरात पाणी गेले होते. नालेसफाई योग्यरित्या व्हायला हवी- प्रवीण चोरबेले, माजी नगरसेवक नाल्याचा प्रवाह मार्केटयार्ड, महर्षि नगर, प्रेमनगर, मुकुंदनगर, शंकरशेठ रस्ता या भागातून जातो. सफाई संदर्भात महानगरपालिका मलनिस्सारण विभागाचे अभियंता दीपक सोनवणे यांना संपर्क केला असता ते म्हणाले महर्षीनगर, मार्केट यार्ड च्या नाले सफाईला सुरुवात केली असून इतर राहिलेली नालेसफाई करून घेण्यात येईल.