उदयनराजेंबाबत भाजपच्या गोटातूनच बातमी पसरवली : मुंडे

पुणे : खासदार उदयनराजे भोसले यांनी कधीच भाजप प्रवेशाबाबत वक्तव्य केलेले नाही. महाराष्ट्रातील प्रश्नांना बगल देण्यासाठी भाजपच्या गोटातून उदयनराजेंच्या भाजप प्रवेशाची बातमी पसरविण्यात आली, असे वक्तव्य राष्ट्रवादीचे नेते धनंजय मुंडे यांनी केले.

उदयनराजे यांनी पक्षाचे अध्यक्ष शरद पवार यांची आज (ता. 12) त्यांच्या पुण्यातील निवासस्थानी भेट घेतली. या भेटीवेळी धनंजय मुंडे व शशिकांत शिंदे उपस्थित होते. उदयनराजेंचे मन वळविण्यात राष्ट्रवादीला यश आल्याचे बोलले जात आहे. या भेटीनंतर धनंजय मुंडे यांनी माहिती दिली.

मुंडे म्हणाले, की आजची बैठक विधानसभा निवडणुकीच्या तयारीसाठी होती. पक्षाची भूमिका काय असेल, यासाठी चर्चा झाली. पक्षाची भूमिका काय याबाबत सविस्तर चर्चा झाली.  भाजप प्रवेशाबाबत उदयनराजेंनी कधीच वक्तव केलेले नाही. महाराष्ट्रातील प्रश्नांपासून लक्ष विचलित करण्यासाठी भाजपच्या गोटातून ही बातमी पसरविण्यात आली. उदयनराजेंच्या नाराजीबाबत विषयच नाही. शिवस्वराज्य यात्रेवेळी त्यांच्यामागे अनेक कामे होती. त्यामुळे त्यांना येता आले नाही.