#DogBite रेबिज इंजेक्‍शनसाठी रुग्णांची ससेहोलपट

Dog-Bite
Dog-Bite

पुणे - रेबिजचे इंजेक्‍शन संपले आहे... कधी येईल माहिती नाही... तुम्ही आत्ता जाच आणि उद्या या... आता ‘लंच ब्रेक’ झाला... दोन वाजता या... अशी रुग्णांची अक्षरशः ससेहोलपट महापालिकेच्या गाडीखाना (डॉ. कोटणीस) दवाखान्यातील नर्स करतात. त्यात येथील वैद्यकीय अधिकारीही मागे नाहीत, हे सोमवारी दुपारी पुढे आले. रुग्णाला कुत्रे चावल्यानंतर १८ तासांनी महापालिकेच्या आरोग्यप्रमुखांच्या कानपिचक्‍यांमुळे अखेर रेबिजचे इंजेक्‍शन मिळाले. 

कुत्रे चावल्याच्या वेदना एका बाजूला, त्या कुत्र्याला रेबीज आहे की, नाही याचे ‘टेन्शन’ दुसरीकडे. अशा स्थितीत एकापाठोपाठ एक सरकारी दवाखान्यांच्या पायऱ्या चढूनही रेबिजचे इंजेक्‍शन मिळता मिळत नव्हते.

रविवारी कामानिमित्त सासवडला गेल्यानंतर संध्याकाळी सहाला कुत्रे चावल्या-चावल्या मी ग्रामीण रुग्णालयात गेले. तेथे ‘उद्या या’ असे उत्तर मिळाले. सोमवारी सकाळी परत गेल्यानंतर इंजेक्‍शन आले नाही, दुपारी या असे म्हणून परत पाठविले. कामासाठी पुण्यात जाणार असल्याने पुण्यातच घेऊ असे म्हणून स्वारगेटवरून थेट गाडीखाना गाठला. तेथे तर केस पेपर काढणाऱ्यानेच परत घरी पाठवून देण्याची तयारी केली होती. कुत्रे चावलेला रुग्ण दवाखान्यात जाणारच नाही, आणि गेला तरीही त्याला इंजेक्‍शन मिळणार नाही, याची पुरेपूर व्यवस्थाच या रुग्णालयातील परिचारिका आणि डॉक्‍टरांनी केल्याचे येथे दिसून आले. कुत्र्याचे इंजेक्‍शन नाही. तुम्ही परत जा... उद्या या... अशा भाषेत तेथील नर्स बोलू लागल्या... हे सांगत असताना अनिता पवार असहाय्य झाल्याचे स्पष्ट दिसून येत होते. 

गाडीखान्याच्या वैद्यकीय अधिकाऱ्यांनी दिलेले उत्तर तर अत्यंत संतापजनक होते. ते म्हणाले, ‘‘कुत्रे चावलेल्या इंजेक्‍शनचा दहाचा कोटा होता. तो सकाळी संपला. दुसरा कोटा उद्या मिळेल. त्यामुळे तुम्ही उद्या सकाळी या.’’ २४ तासांत इंजेक्‍शन घेण्यासाठी पवार वणवण फिरत होत्या. 
सरकारी रुग्णालयातून इंजेक्‍शनसाठी महिला वणवण फिरत असल्याची माहिती ‘सकाळ’पर्यंत पोचली. त्यानंतर ‘सकाळ’चा प्रतिनिधी त्यांना थेट महापालिकेचे आरोग्य प्रमुख डॉ. रामचंद्र हंकारे यांच्याकडे घेऊन गेला. डॉ. हंकारे यांनी परिस्थितीचे गांभीर्य ओळखून वैद्यकीय अधिकाऱ्यांना कानपिचक्‍या दिल्या. रुग्णांना तातडीने इंजेक्‍शन देण्याच्या सूचना केल्या. त्यानंतर इंजेक्‍शन संपल्याचे सांगणाऱ्या डॉक्‍टरांनी रुग्णाला इंजेक्‍शन दिले. त्यामुळे अखेर चोवीस तासांच्या आत रुग्णाला इंजेक्‍शन मिळाले.

तुमच्या प्रतिक्रिया नोंदवा
रुग्णांना वेळेत इंजेक्‍शन देण्यात टाळाटाळ करणारे वैद्यकीय अधिकारी आणि रुग्णांशी फटकून वागणाऱ्या नर्स यांच्यावर महापालिकेने कारवाई केली पाहिजे, असे तुम्हाला वाटते का? तुमचाही महापालिकेच्या रुग्णालयाबद्दल असाच अनुभव असेल, तर ९१३००८८४५९ या व्हॉट्‌सअप क्रमांकावर आम्हाला नक्की कळवा. तसेच, webeditor@esakal.com  या ई-मेलवर किंवा 
@eSakalUpdate या ट्विटर हॅंडलवर आणि @SakalNews  या फेसबुक पेजवर या घटनेबद्दलच्या आपल्या प्रतिक्रिया आवर्जून नोंदवा. 

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com