ई-बसची कमाई अपेक्षेपेक्षा कमी

पुणे - पीएमपीच्या पर्यावरणपूरक ई-बसला नागरिकांचा चांगला प्रतिसाद मिळत आहे. एका महिन्यात २५ ई-बसने सुमारे ५२ लाख रुपयांची कमाई केली. उत्पन्नामध्ये वाढ होत असली तरी, ही कमाई अपेक्षेपेक्षा कमी असल्याचे पीएमपी प्रशासनाकडून सांगण्यात आले.

शहरामध्ये १२ फेब्रुवारीला ई-बस सेवा सुरू करण्यात आली. ही सेवा सात मार्गांवर सुरू आहे. पीएमपीला फेब्रुवारीमध्ये एक ई-बस प्रतिदिन साडेपाच हजार रुपये कमावून देत होती. मार्चमध्ये ही संख्या वाढली असून, १ ते १७ मार्चदरम्यान एका ई-बसची कमाई दररोज साडेसहा हजार रुपये आहे. या वाढत्या उत्पन्नावरून प्रवाशांची ई-बसला पसंती मिळत असल्याचे दिसून येते. डिझेल आणि सीएनजी बसला होणाऱ्या खर्चापेक्षा ई-बसचा खर्च कमी आहे. त्यामुळे ई-बस पीएमपीला जास्त उत्पन्न देत आहे, असे प्रशासनाने सांगितले.

  ई-बस - २५, ई- बस मार्ग - ७ , चार्जिंग स्टेशन - २
  १२ ते २८ फेब्रुवारीदरम्यानचे उत्पन्न - २३ लाख ७५ हजार २५
  १ मार्च ते १७ मार्चदरम्यानचे उत्पन्न - २८ लाख २९ हजार ४१५
  ई-बसचे अपेक्षित उत्पन्न - ४० रुपये प्रतिकिलोमीटर
  ई-बसचे प्रत्यक्षात मिळणारे उत्पन्न - ३१ रुपये प्रतिकिलोमीटर
  ई-बसचा खर्च - ४ रुपये प्रतिकिलोमीटर
  एका बसची प्रवासी संख्या - सुमारे१ हजार प्रतिदिन

प्रवाशांना सुलभ आणि आधुनिक सेवा मिळावी, हा प्रशासनाचा उद्देश आहे. त्या दृष्टीने प्रयत्न केले जाते आहेत. सर्व ई-बस मार्गांवर उतरविण्यात येत असून, प्रवाशांचा या बसला चांगला प्रतिसाद मिळत आहे.
- सुभाष गायकवाड, जनसंपर्क अधिकारी, पीएमपी

ई-बसचा अपेक्षापेक्षा खूप छान अनुभव होता. अतिशय चांगली अंतर्गत सजावट, हिरवे मॅट आणि वातानुकूलन व्यवस्था यामुळे प्रवास चांगला वाटला. नेहमीच्या बससारखा आवाज आणि ब्रेक मारल्यावर बसणारे धक्के जाणवत नव्हते. 
- अमोल देशपांडे, प्रवासी