कुटुंबकल्याणच्या साहित्य नोंदी ऑनलाइन

औंध - कुटुंबकल्याण विभागाच्या साहित्याच्या नोंदी आता फॅमिली प्लॅनिंग लॉजिस्टिक इन्फॉर्मेशन सिस्टीमद्वारे होणार असल्याने मागणी व पुरवठ्याची माहिती एलएमआयएस या सॉफ्टवेअरवर ऑनलाइन बघता येणार असल्याची माहिती जिल्हा परिषदेचे अतिरिक्त जिल्हा आरोग्य अधिकारी डॉ. दिलीप बोरा यांनी दिली. ही माहिती वेब, मोबाईल ॲप व एसएमएस याद्वारे उपलब्ध केली जाईल असेही ते म्हणाले.

केंद्र सरकारच्या कुटुंब कल्याण विभागाकडून येणारे साहित्य राज्य, विभाग, जिल्हा परिषद, मनपा व त्यानंतर संबंधित रुग्णालय, ग्रामीण रुग्णालय या पातळीवर वाटप केले जाते. आरोग्य केंद्रात व कार्यक्षेत्रात काम करणाऱ्या नर्स, सेविका यांच्यामार्फत थेट प्रत्यक्ष लाभार्थ्यांना हे साहित्य पुरवले जाते. त्यामुळे केंद्र सरकार ते ग्रामीण रुग्णालय पातळीवर कार्यरत कर्मचाऱ्यांपर्यंत या साहित्याच्या माहितीचे आदान प्रदान सहज होणार आहे. यासंदर्भात औंध येथील जिल्हा रुग्णालयाच्या आवारामधील कुटुंब कल्याण विभागाच्या प्रशिक्षण केंद्रात पुणे विभागातील कर्मचाऱ्यांसाठी प्रशिक्षण आयोजित करण्यात आले होते. या वेळी डॉ. बोरा यांनी ही माहिती दिली. यापूर्वी सर्व नोंदी कागदोपत्री होत. त्यामुळे केंद्रीय व राज्य स्तरावर माहिती देण्यास विलंब व्हायचा. परंतु आता दिल्ली ते ग्रामीण पातळीपर्यंत कुटुंब कल्याणच्या साधनांची देखरेख व नियंत्रण ठेवणे सुलभ होणार आहे. यामुळे साहित्याचे नेमके वाटप किती झाले व किती आवश्‍यकता आहे याची माहिती मिळते व यात पारदर्शकताही राहते. या नवीन ॲपची माहिती संबंधित सरकारी यंत्रणा, संस्था, दवाखान्यातील नोंद विभागातील कर्मचारी यांना एका पासवर्डद्वारे पाहता व भरता येईल.