आई-वडिलांचा सांभाळ न करणे पडणार महागात!

लोणी काळभोर : वृद्ध आई व वडिलांचा सांभाळ करण्यास नकार दिल्याप्रकरणी कदम वाकवस्ती (ता. हवेली) येथील दोन सख्ख्या भावांविरोधात लोणी काळभोर पोलिसांनी आई - वडिलांचा व ज्येष्ठ नागरिकांचा निर्वाह व कल्याण अधिनियम कायदा अधिनियम २००७ चे कलम २४ अन्वये गुन्हा दाखल केला आहे.

परशुराम भरत कांबळे व बाळासाहेब परशुराम कांबळे (रा. दोघेही, कवडीपाट, कदमवाकवस्ती ता. हवेली) ही गुन्हा दाखल झालेल्या सख्ख्या भावांची नावे असुन, भारत रघुनाथ कांबळे (वय- 64) यांनी या प्रकरणी लोणी काळभोर पोलिसात तक्रार दिली आहे. दरम्यान, आई-वडिलांचा सांभाळ न केल्याच्या कारणावरुन गुन्हा दाखल होण्याची लोणी काळभोर पोलिस ठाण्यातील पहिलीच घटना आहे. 

पोलिस निरीक्षक सुरज बंडगर यांनी दिलेल्या माहितीनुसार, भारत कांबळे व त्यांच्या दोन्ही मुलांनी मिळून कवडीपाट टोलनाक्याजवळ जागा खरेदी करुन तीन खोल्यांचे घर बांधले. एका खोलीत भरत कांबळे व त्यांच्या पत्नी राहतात. तर उर्वरीत दोन खोल्यात परशुराम व बाळासाहेब आपल्या मुलाबाळासह राहतात. भरत कांबळे व त्यांच्या पत्नीला वय झाल्याने कामधंदा करता येत नाही. यामुळे उत्पन्न काहीही नसल्याने मागील दोन वर्षांपासून भरत कांबळे दोन्ही मुलांना आई-वडिलांचा सांभाळ करावा, अशी वारंवार विनंती करत होते. मात्र, दोन्ही मुलांनी सांभाळ करण्याऐवजी भरत कांबळे व त्यांच्या पत्नीला घराबाहेर हाकलून काढले.

वारंवार विनंती करुनही, मुले घरात घेत नसल्याचे लक्षात आल्यानंतर भरत कांबळे  यांनी पत्नीसह पोलिस ठाण्यात जाऊन तक्रार दिली. यावरुन पोलिसांनी आई-वडिलांचा व ज्येष्ठ नागरिकांचा निर्वाह व कल्याण अधिनियम कायदा अधिनियम २००७ चे कलम २४ अन्वये गुन्हा दाखल केला आहे. पुढील तपास पोलिस हवालदार महेंद्र लोहार करत आहेत.