जादा नफ्याचे आमिष दाखवुन बाप-लेकाची फसवणुक

पुणे  : शैक्षणिक संस्थामध्ये गुंतवणुक केल्यानंतर जादा परतावा देण्याचा बहाणा पैसे घेतले, मात्र परत न करता दोघांनी 11 लाख रूपयांची फसवणुक केल्याचा प्रकार उघडकीस आला. याच पद्धतीने अन्य नागरिकांची ही लाखो रूपयांची फसवणुक केल्याप्रकरणी विश्रामबाग पोलिसांनी संबंधित शिक्षण संस्थेच्या दोघांना अटक केली. 

विलास कुरडे ( वय 52, रा. कोथरुड) यांनी याप्रकरणी विश्रामबाग पोलिस ठाण्यात फिर्याद दिली. त्यावरुन मिलिंद जनार्धन पिंपळकर (वय 45) व मोहिनी मिलिंद पिंपळकर (वय 40, रा.चव्हाणनगर, धनकवडी) असे अटक केलेल्या संशयित आरोपीची नावे आहेत.

सहायक पोलिस निरीक्षक बी.एम. रायकर यांनी दिलेल्या माहितीनुसार, पिंपळकर यांनी 2014 मध्ये वृत्तपत्रामध्ये "रियल एज्युकेशन फर्म" सुरु करणार असल्याची जाहिरात दिली होती. त्यामध्ये पाच टक्के जादा परतावा देण्याचे आमिष दाखवुन गुंतवणुक करण्यासाठी आवाहान केले होते, त्यानुसार फिर्यादी यांनी त्यास प्रतिसाद देत स्वत:च्या नावे पाच आणि मुलाच्या नावे सहा असे 11 लाख रूपये गुंतविले. त्यानंतर फिर्यादींना केवळ 3 टक्के दराने व्याजाची रक्कम दिली. आपली फसवणुक होत असल्याचे लक्षात आल्यानंतर त्यांनी उर्वरीत रक्कम मागन्यास सुरवात केली. मात्र, आरोपींनी पैसे देण्यास नकार दिला. दरम्यान, फिर्यादी यांच्याप्रमाणेच संजय भेलके (रा. धायरी), भरत विटकुरकर व कोंढवा येथे राहणाऱ्या एका महिलेसही गुंतवणुकीपोटी जादा रकमेचे आमिष दाखवुन तब्बल 39 लाख रूपयाची फसवणुक केल्याचे उघडकी आले. दरम्यान विश्रामबाग पोलिसांनी रियल शिक्षन संस्थाचे दोघाना अटक केली.