पूरबाधितांना विविध संघटनांकडून मदतीचा हात 

पुणे ः बाणेर, बालेवाडी, औंध, बोपोडी येथील पुराने बाधित झालेल्या कुटुंबांना सर्वच स्तरांमधून मदत दिली जात आहे. यामध्ये अन्नाची पाकिटे, कपडे, औषधे, सॅनिटरी पॅड व इतर आवश्‍यक साहित्य वैयक्तिक पातळीवर लोकप्रतिनिधी, विविध संघटनांसह महापालिकेकडून दिली जात आहे. 

बाणेर- बालेवाडी मेडिकोज असोसिएशन (बीएमए), बाणेर बालेवाडी पाषाण रेसिडेन्शियल असोसिएशन (बीबीपीआरए), औंध विकास मंडळ यांच्यासह रोटरीकडूनही विविध स्वरूपाची मदत दिली केली जात आहे. तर बीएमए व महापालिकेच्या आरोग्य विभागाच्या वतीने नागरिकांची आरोग्य तपासणी करून औषधोपचार करण्यात येत आहेत. 

बालेवाडी येथील बालवडकर शाळेतील स्थलांतरित सातशे, इंदिरा गांधी शाळेतील एकशे दहा व बोपोडीतील डॉ. राजेंद्र प्रसाद शाळेतील अकराशे जणांना जेवणासह वैद्यकीय सेवा पुरवण्यासाठी प्रशासकीय व स्थानिक पातळीवर प्रयत्न केले जात आहेत. 
रविवारपासून बोपोडी येथील शाळेत जवळपास 169 जणांची तपासणी करून उपचार केले आहेत. चार रुग्णांसह करीबी नूर महम्मद शेख या अत्यवस्थ ज्येष्ठ महिलेला रुग्णालयात उपचारासाठी हलवण्यात आल्याचे वैद्यकीय अधिकारी डॉ. स्वाती बढीये यांनी सांगितले. प्रभाग क्रमांक आठ व नऊमधील सर्वच लोकप्रतिनिधीही सर्व ठिकाणच्या नागरिकांना अन्न व पूरक साहित्यांची मदत केली आहे. 
------