आरोग्य विभागाच्या भरती प्रक्रियेत त्रुटी; परीक्षार्थींमध्ये संताप

पुणे : आरोग्य विभागातील इलेक्ट्रिशियन पदासाठी मी अर्ज केला असून, येत्या शनिवारी (ता. २५) माझी लेखी परीक्षा आहे. विभागाच्या संकेतस्थळावर बुधवारी दुपारी प्रवेशपत्र आले. त्यात ना माझा फोटो आहे, ना परीक्षा केंद्र. सांगा मी नक्की काय करायला हवं, बारामती राहणारा राजेश बडे (नाव बदललं) पोट तिडकीने आपली समस्या सांगत होता. केवळ राजेशच नाही, राज्यभरातील प्रत्येक जिल्ह्यातील उमेदवाराची हीच अवस्था आहे.

सार्वजनिक आरोग्य विभागाच्या वतीने गट क आणि ड प्रवर्गातील कर्मचाऱ्यांची भरती करण्यात येत आहे. यासाठी शनिवार (ता. २५) आणि रविवार (ता. २६) लेखी परीक्षा आयोजित करण्यात आली आहे. मात्र, या परीक्षेसाठी उमेदवारांच्या प्रवेश पत्राबाबत प्रचंड गोंधळ आहे. एका खासगी स्पर्धा परीक्षा केंद्राचे संचालक विकास सिंदाळकर म्हणाले, ‘‘राज्यभरात आठ लाखापेक्षा जास्त उमेदवारांनी परीक्षेसाठी अर्ज केले असून, प्रवेश पत्रातील गोंधळामुळे उमेदवारांना प्रचंड मनस्ताप सहन करावा लागत आहे.’’

न्यासा नावाच्या कंपनीकडे राज्य सरकारने भरती प्रक्रियेचे काम दिले असल्याचे पुण्याचे मुख्य वैद्यकीय अधिकारी डॉ. नंदकुमार देशमुख यांनी सांगितले. संबंधित कंपनी उमेदवारांचा व्हॉट्सअप संपर्क क्रमांक, ई-मेल आणि संकेतस्थळाच्या माध्यमातून प्रवेशपत्र उपलब्ध करून देत आहे. आरोग्य विभागाच्या मार्फतही उमेदवारांच्या समस्या सोडविण्यासाठी जिल्हास्तरावर विशेष कक्ष स्थापन करत आहोत. संकेतस्थळावर ई-मेलच्या माध्यमातूनही समस्यांचे निराकरण चालू असून, उद्या दुपारपर्यंत उमेदवारांना प्रवेशपत्र मिळेल, असे त्यांनी सांगितले.

दरम्यान, ग्रामविकास विभागाच्या अंतर्गत येणाऱ्या जिल्हा स्तरावरील आरोग्य सेवक भरती प्रक्रियेतही अशाच प्रकारचा मनस्ताप परीक्षार्थींना सहन करावा लागल्याच्या तक्रारी होत्या.

उमेदवारांच्या अडचणी

- परीक्षा चार दिवसांवर असताना अभ्यासक्रमाची विद्यार्थ्यांना कल्पना नाही

- अनेकांचे प्रवेशपत्र अजूनही मिळाले नाही

- प्रवेशपत्रावर फोटो, केंद्र आणि वेळ नाही

- दोन पदासाठी अर्ज केलेल्या उमेदवारांना दोन ठिकाणी एकाच दिवशी परीक्षा देणे अशक्य

- संकेतस्थळ अनेकदा हँग होते

आरोग्य विभागातील पदे

१) गट क : रासायनिक सहायक, प्रयोगशाळा वैज्ञानिक अधिकारी, रक्तपेढी तंत्रज्ञ, आहार तज्ज्ञ, अधिपरीचारिका, वरिष्ठ तंत्रज्ञ, सुतार, वाहन चालक

२) गट ड : शिपाई, कक्षसेवक, बाह्यरुग्ण सेवक, अपघात विभाग सेवक, प्रयोगशाळा सेवक, रक्तपेढी परिचर, दंतसहाय्यक, पुरुष/स्त्री परिचर, अकुशल कारागीर, मदतनीस... आदी

सार्वजनिक आरोग्य विभाग भरती २०२१ :

संवर्ग : पदांची संख्या : आलेले अर्ज

गट क : २७२५ : ४,०५,०००

गट ड : ३४६६ : ४,६१,०००

१३ जून २०१८ च्या परिपत्रकानुसार परीक्षेला ५० प्रश्न १०० गुण असा आहे. मात्र, त्यामध्ये कोणकोणते विषय असतील, महत्त्वाचे म्हणजे इंग्रजी आहे की नाही याविषयी संभ्रम आहे. या परिपत्रकात कोठेही गट ‘ड’ चा उल्लेख नाही.

- मेघदूत हेर्लेकर, परीक्षार्थी

नाशिक जिल्ह्यातून इलेक्ट्रिशियन आणि ठाणे जिल्ह्यांमधून वाहन चालक या पदासाठी अर्ज केला आहे. प्रवेश पत्रावर एकाच दिवशी या दोन्ही परीक्षा द्यायला सांगितले. आता नक्की काय करावे हा प्रश्न आहे. या दोन्हीसाठी माझा अर्ज आणि प्रवेश शुल्क स्वीकारले गेले.

- हेमंत गायकर, परीक्षार्थी, नाशिक