पुण्यात साडेआठ कोटींचा गृहकर्ज गैरव्यवहार उघडकीस; चौघे अटकेत

पुणे : बोगस कागदपत्रांद्वारे तयार केलेली गृहकर्ज प्रकरणे एका फायनान्स कंपनीकडे सादर करीत तब्बल आठ कोटी 60 लाख रुपयांचा गैरव्यवहार केल्याचा प्रकार उघडकीस आला आहे. फायनान्स कंपनी, बँक, जमिनीचे मूल्यांकन करणाऱ्या कंपनीच्या अधिकारी व कर्मचाऱ्यांनी संगनमत करुन फायनान्स कंपनीची फसवणूक केली. याप्रकरणी आर्थिक व सायबर गुन्हे शाखेने चार जणांना अटक केली आहे. 

प्रशांत दत्तात्र्यय मुक्ते (वय 37, रा.सोमवार पेठ), चंद्रकांत दामु मैदाड (रा.मुंबई), प्रवीण दशरथ सावंत (वय 42, रा.खारघर, मुंबई), विशाल टेमगिरे (वय 30, रा.कोथरुड) व वसंत किसन केळतकर (वय 27, रा.धायरी) अशी अटक केलेल्या संशयित आरोपींची नावे आहेत. तर अमित गोखले, देवेंद्र भुस्कुटे, रामकृष्ण वालकर, राजेंद्र कोंढाळकर, संदिप कृष्णा कदम, गोरख पांचाळ, शैलेश महांकाळे, नितीन परब यांच्याविरुद्ध आर्थिक फसवणूकीचा गुन्हा दाखल करण्यात आला आहे. याप्रकरणी नितेश रमण नायर (वय 39, रा.यमुनानगर, निगडी) यांनी दत्तवाडी पोलिस ठाण्यात फिर्याद दिली होती. 

फिर्यादी हे एस्पायर होम फायनान्स (सध्याचे नाव मोतीलाल ओसवाल होम फायनान्स) या कंपनीमध्ये विभागीय व्यस्थापक (कलेक्‍शन) या पदावर कार्यरत आहेत. तर वसंत केळतकर हा संबंधीत कंपनीमध्ये शाखा व्यवस्थापक होता. केळतकर याने जमीन मालक मैदाड व अन्य व्यक्तींशी संगनमत करुन पुरंदरमधील खानवडी, मुंजवडी व टेकवडी येथील मिळकतींच्या मुळ किंमतीपेक्षा जास्तीची किंमत दाखवून बनावट व खोटे मुल्यांकन अहवाल बनविले. त्यानंतर बोगस कागदपत्रांद्वारे बनविलेल्या गृहकर्जासमवेत संबंधित मूल्यांकन अहवाल जोडून दिला.

एका प्रकरणामध्ये सहा कोटी 90 लाख 46 हजार रुपये, तर दुसऱ्या प्रकरणामध्ये एक कोटी 57 लाख 87 हजार रुपयांची कर्ज प्रकरणे केळतकर याने मंजूूर केली. त्यानंतर संबंधित रकमेचे धनादेश मैदाड याच्या बँक खात्यामध्ये जमा झाली. मैदाड याने या संबंधित व्यक्तींना दोन ते तीन टक्के याप्रमाणे कमिशन दिले. त्यानंतर उर्वरीत रक्कम स्वतःकडे ठेवली. मुक्ते व सावंत या दोघांचा दोन्ही प्रकरणांमध्ये सहभाग आहे. हा प्रकार फिर्यादी व कंपनीच्या वरिष्ठ अधिकाऱ्यांच्या निदर्शनास आल्यानंतर त्यांनी 22 ऑगस्ट रोजी याप्रकरणी दत्तवाडी पोलिस ठाण्यात गुन्हा दाखल केला.

त्यापैकी काही आरोपींना अटक करण्यात आली असून उर्वरीत आरोपींचा शोध सुरू असल्याची माहिती आर्थिक व सायबर गुन्हे शाखेचे पोलिस उपायुक्त संभाजी कदम यांनी सांगितले. या प्रकरणाचा तपास पोलिस निरीक्षक विजयकुमार लांबतुरे करीत आहेत.