कोथरूडसह शहराच्या विविध भागांत अपुरा पाणीपुरवठा 

पुणे : नागरिक अपुऱ्या पाणीपुरवठ्यामुळे त्रस्त झाले असून, केवळ पाणीपुरवठा सुरळीत होईल, असे आश्‍वासनच त्यांच्या पदरी पडत आहे. ऐन दिवाळीच्या तोंडावर पाणीपुरवठा विस्कळित झाल्याने सत्ताधारी भाजपच्या आणखी एका लोकप्रतिनिधीला महापौरांसोबत बैठक घेण्याची वेळ आली. 

खासदार अनिल शिरोळे यांच्या पाठोपाठ आता कोथरूड भागातील पाणीप्रश्‍नी स्थायी समितीचे माजी अध्यक्ष मुरलीधर मोहोळ यांना महापौरांकडे धाव घ्यावी लागली. या भागात दोन आठवड्यांपासून कमी दाबाने पाणी येत आहे. यासंदर्भात प्रशासनाकडे सातत्याने पाठपुरावा केल्यानंतर पाणीपुरवठा सुरळीत झाला नाही. नगरसेविका हर्षाली माथवड, वासंती जाधव आणि मोहोळ यांनी बुधवारी महापौर मुक्ता टिळक यांच्याकडे धाव घेतली. त्यामुळे महापौरांनी आयुक्त सौरव राव, अतिरिक्त आयुक्त राजेंद्र निंबाळकर आणि पाणीपुरवठा विभागाच्या अधिकाऱ्यांसोबत बैठक घेतली. या वेळी झालेल्या चर्चेत येत्या दोन दिवसांत या भागातील पाणीप्रश्न सोडवू, असे आश्‍वासन प्रशासनाने दिले. 
दरम्यान, शहराच्या मध्यवर्ती भागात पाण्याचा अपुरा पाणीपुरवठा होत आहे. कसबा पेठ, रविवार पेठ, गुरुवार पेठ, गणेश पेठ, लालबहादरू शास्त्री रस्ता, कर्वे रस्ता, पर्वती दर्शन या भागातून पाणीपुरवठ्यासंदर्भात नागरिकांच्या तक्रारी येत आहेत. 

"जलसंपदा'ला पत्र देणार कधी? 
जलसंपदा विभागाने महापालिकेला 1150 एमएलडीपेक्षा अधिक पाणी घेण्यास मनाई केली आहे. यामुळे शहराची गरज जास्त असूनही कमी पाणी उचलावे लागत आहे. यामुळे पाणीपुरवठ्यावर परिणाम झाला आहे. शहराची वाढती लोकसंख्या आणि गरज लक्षात घेऊन जलसंपदा विभागाकडे जास्त पाणी मागण्याचे पत्र दिले जाईल, असे आश्‍वासन आयुक्तांनी सर्वसाधारण सभेत दिले होते. मात्र त्यात अद्याप प्रगती झाली नाही. 

नवीन वेळापत्रकानुसार पाणीपुरवठा होत असल्याने थोड्या अडचणी येत आहेत; परंतु येत्या दोन दिवसांत पाणीपुरवठा सुरळीत होईल. टाक्‍यांतील पाण्याची पातळी नियमित ठेवण्यात येत आहे. 
-प्रवीण गेडाम, अधिक्षक अभियंता, पाणीपुरवठा