खडकवासला वाहनतळासाठी हालचाली सुरू; हवेली पोलीसांचे विविध विभागांना पत्र

किरकटवाडी : खडकवासला धरण चौपाटी परिसरात सुसज्ज वाहनतळ व्हावा यासाठी आता प्रशासकीय पातळीवर हालचाली सुरू झाल्या आहेत. हवेली पोलीस ठाण्याचे प्रभारी अधिकारी तेगबिरसिंह संधु यांनी याबाबत विविध शासकीय विभागांना पत्र लिहून योग्य कार्यवाही करण्याची विनंती केली आहे. 'खडकवासला चौपाटी परिसरात वाहनतळाची गरज' अशा आशयाचे वृत्त दि. 1 जून रोजी 'सकाळ'मधून प्रसिद्ध झाल्यानंतर त्याची दखल घेण्यात आली आहे.

खडकवासला धरण चौपाटी जवळ पुणे-पानशेत रस्ता अरुंद आहे. सिंहगड किल्ला, पानशेत व वरसगाव धरण तसेच आजुबाजुच्या 30 ते 40 गावांना जाण्यासाठी हा एकमेव रस्ता आहे. दिवसेंदिवस या भागात पर्यटकांची संख्याही वाढत आहे. त्यामुळे या रस्त्यावरून वाहनांची मोठ्या प्रमाणात ये-जा असते. खडकवासला धरण चौपाटी परिसरात आलेल्या पर्यटकांना वाहने उभी करण्यासाठी कोणतीही व्यवस्था नसल्याने रस्त्याच्या दुतर्फा अस्ताव्यस्त वाहने उभी करण्यात येतात. याचा वाहतुकीस अडथळा निर्माण होऊन दर शनिवार व रविवारी वाहतुक कोंडी होते. याचा पर्यटकांसह स्थानिकांनाही मनःस्ताप सहन करावा लागतो. तसेच पोलीस प्रशासनाचीही वाहतूक सुरळीत करताना दमछाक होते.

ही समस्या सोडविण्यासाठी हवेली पोलीस ठाण्याचे प्रभारी अधिकारी आयपीएस तेगबीरसिंह संधु यांनी पुणे महापालिका आयुक्त, जिल्हाधिकारी, सार्वजनिक बांधकाम विभाग, पाटबंधारे विभाग,वन विभाग , पोलीस अधीक्षक व हवेली उपविभागीय पोलीस अधिकारी यांना पत्र लिहून वाहनतळासाठी प्रशस्त जागा उपलब्ध करून देण्याची विनंती केली आहे. त्यामुळे लवकरच याबाबत कार्यवाही सुरू होईल अशी अपेक्षा स्थानिक नागरिक व पर्यटकांनी व्यक्त केली आहे.