बिबट्यांची तस्करी उघड

खेड शिवापूर - पुणे-सातारा महामार्गावरील येथील टोल नाक्‍यावर सोमवारी (ता. २०) बिबट्याच्या बछड्यांची तस्करी करणाऱ्या तीन जणांना राजगड पोलिसांनी अटक केली. त्यांच्याकडून तीन ते चार महिने वयाचे बिबट्याचे दोन बछडे ताब्यात घेण्यात आले. त्यांना कात्रज (पुणे) येथील वन्यजीव अनाथालयाकडे सुपूर्त करण्यात आले आहे. मुन्ना हबीब सय्यद (वय ३१, रा. शिरूर), इरफास मेहमूद शेख (वय ३२, रा. कोंढवा बुद्रुक, पुणे) आणि गाडीचा चालक आयास बक्‍शुलखान पठाण (वय ४०, रा, घोरपडी पेठ, पुणे) अशी अटक करण्यात आलेल्यांची नावे आहेत. दरम्यान, ते  बछडे बंगळूरवरून आणून, परदेशात विकण्याच्या उद्देशाने तस्करी करण्यात येत होती, असे तपासात उघड झाले.