पोलिसांच्या तत्परतेने तरुणाला जीवदान

पुणे - रविवारी रात्री अकराची वेळ...पोलिस नियंत्रण कक्षातून हडपसर पोलिस ठाण्याच्या बीट मार्शलना एका तरुणाने गळफास घेतल्याबाबत कॉल येतो...पोलिस घटनास्थळी पोचल्यानंतर पत्नीबरोबर झालेल्या भांडणामुळे एका व्यक्तीने काही मिनिटांपूर्वीच गळफास घेतल्याचे दिसते. पोलिस तत्काळ त्या तरुणाला १०८ रुग्णवाहिकेतून रुग्णालयात पोचवितात. अखेर पोलिसांच्या प्रयत्नामुळे एका तरुणाचे प्राण वाचण्यास मदत होते. 

सविस्तर ब्लॉग्स वाचण्यासाठी क्लिक करा :

ही घटना हडपसरमधील भगवती हाउसेस परिसरात काल (ता. १५) रात्री घडली. हडपसर पोलिस ठाण्याचे बीट मार्शल विठ्ठल चिपाडे व युवराज कांबळे हे रविवारी रात्रगस्तीवर होते. त्या वेळी पोलिस नियंत्रण कक्षातून वॉकीटॉकीद्वारे कौटुंबिक भांडणातून एका व्यक्तीने गळफास घेतल्याची माहिती त्यांना मिळाली. त्यानंतर दोघेही काही मिनिटांतच हडपसरमधील भगवती हाउसेस येथे दाखल झाले. तेथे ३२ वर्षांच्या एका तरुणाने गळफास घेतला होता. चिपाडे व कांबळे यांनी आतून बंद असलेला दरवाजा धक्के मारून उघडला. त्या दोघांनी तरुणाच्या गळ्यातील फास चाकूने कापला. त्याचवेळी १०८ रुग्णवाहिकेस दूरध्वनी करून बोलावून घेतले. रुग्णवाहिका वेळेत पोचल्यानंतर त्याला तातडीने रुग्णालयात नेण्यात आले. रुग्णालयामध्ये दाखल केल्यावर डॉक्‍टरांनी त्याच्यावर उपचार केले. थोड्या वेळाने तो तरुण शुद्धीवर आला. त्यामुळे त्यांचे कुटुंबीयही सुखावले. 

आम्ही घटनास्थळी गेलो, त्या वेळी बघ्यांच्या गर्दीतील काहीजण मोबाईलवर छायाचित्रे काढण्यात, तर काही मोबाईलवर चित्रीकरण करण्यात गुंग असल्याचे दिसले; परंतु गळफास घेणाऱ्या व्यक्तीचा जीव वाचविण्यासाठी कोणीच पुढे येत नव्हते. गळफास घेऊन काही मिनिटेच झाली होती. त्यामुळे आम्ही त्याला लगेच दवाखान्यात हलविल्याने त्याचा जीव वाचला.
-विठ्ठल चिपाडे,  पोलिस कर्मचारी, हडपसर.