एक लिंगायत, कोट लिंगायत

पुणे - लिंगायत धर्माला संविधानिक मान्यता मिळावी आणि राष्ट्रीय स्तरावर अल्पसंख्याकचा दर्जा मिळावा, या मागणीसाठी अखिल भारतीय लिंगायत समन्वय समितीच्या वतीने रविवारी विभागीय आयुक्तालयावर महामोर्चा काढण्यात आला. ‘भारत देशा, जय बसवेशा’; ‘एक लिंगायत, कोट लिंगायत’ अशा घोषणा देत लिंगायत समाजाचे हजारो महिला आणि पुरुष महामोर्चात सहभागी झाले होते.

बाजीराव रस्त्यावरील महाराणा प्रताप उद्यानातील बसवेश्वर महाराजांच्या पुतळ्याला पुष्पहार अर्पण करून महामोर्चा निघाला. राष्ट्रसंत डॉ. शिवलिंग शिवाचार्य अहमदपूरकर, जगद्‌गुरू चन्नबस्वानंद महास्वामी, डॉ. बसवलिंग पट्टदेवरू भालकी स्वामीजी, लिंगायत समन्वय समितीचे राष्ट्रीय समन्वयक अविनाश भोसीकर, रमेश कोरे, बसव दलाचे राष्ट्रीय अध्यक्ष बसवराज धनुर, सुधीर सिंहासने, सतीशकुमार पाटील, सदाशिव आलमखाने, बाळासाहेब होनराव, काँग्रेसचे नेते मोहन जोशी यांच्यासह महाराष्ट्र, कर्नाटक, तेलंगण, आंध्र प्रदेशातील समाजातील स्त्री-पुरुष मोर्चात सहभागी झाले होते. हातात धर्माचा झेंडा. डोक्‍यावर टोपी आणि गळ्यात भगवी मफलर घेऊन सहभागी झालेल्या समाजाच्या नागरिकांनी घोषणा देत संपूर्ण परिसर दणाणून सोडला. राधिका बोडके या तरुणीने समाजाच्या मागण्या मांडल्या. 

तत्पूर्वी, झालेल्या सभेत बोलताना कोरे म्हणाले, ‘‘स्वातंत्रपूर्व काळात लिंगायत हा स्वतंत्र धर्म होता. घटनेतदेखील तशी नोंद आहे. जगाला मानवतेचा आणि लोकशाहीचा संदेश बसवेश्वर महाराजांनी दिला. आमच्या मागून आलेल्या समाजाला धर्माचा आणि अल्पसंख्याकाचा दर्जा दिला गेला. आम्हाला भीक नको, आमचा अधिकार हवा आहे.’’

धनुर म्हणाले, ‘‘कर्नाटक सरकारने लिंगायत समाजाला धर्माचा आणि अल्पसंख्याकाचा दर्जा देण्याचा प्रस्ताव मंजूर करून केंद्र सरकारकडे पाठविला आहे. तसाच ठराव महाराष्ट्र सरकारनेदेखील करून केंद्र सरकारकडे पाठवावा.’’

या वेळी चन्नबस्वानंद स्वामी यांच्यासह अनेकांची भाषणे झाली. त्यानंतर विभागीय आयुक्त कार्यालयावर मोर्चा काढण्यात आला. तेथे मागण्यांचे निवेदन देण्यात आले.