Loksabha 2019 : निवडणुकीचा चढतोय रंग

पिंपरी - लोकसभा निवडणुकीच्या पार्श्‍वभूमीवर काँग्रेस, राष्ट्रवादी काँग्रेस व भाजप, शिवसेना या पक्षांच्या मावळ व शिरूर लोकसभा मतदारसंघांतील बैठका सुरू झाल्या आहेत. राष्ट्रवादीचे अध्यक्ष शरद पवार यांनी कार्यकर्त्यांशी साधलेला संवाद आणि मुख्यमंत्री देवेंद्र फडणवीस व शिवसेनेचे कार्याध्यक्ष उद्धव ठाकरे यांची सोमवारी (ता. १८) पुण्यात होणारी संयुक्त बैठक यामुळे शहरातील राजकीय वातावरण ढवळून निघत आहे.

राष्ट्रवादीने शिरूर लोकसभा मतदारसंघातून डॉ. अमोल कोल्हे व मावळातून पार्थ पवार यांची उमेदवारी जाहीर केली आहे. त्या पार्श्‍वभूमीवर पदाधिकारी व कार्यकर्त्यांशी राष्ट्रवादीचे अध्यक्ष शरद पवार यांनी व्हिडिओ कॉन्फरन्सद्वारे संवाद साधला होता. अजित पवार यांनी राष्ट्रवादीसह मित्रपक्षांच्या पदाधिकाऱ्यांच्या गाठीभेटी घेतल्या. दरम्यान, भाजप-शिवसेना युतीतर्फे रविवारी सायंकाळपर्यंत मावळ व शिरूरमधील उमेदवारांची नावे जाहीर झालेली नव्हती. मात्र, विद्यमान खासदार श्रीरंग बारणे व शिरूरचे विद्यमान खासदार शिवाजीराव आढळराव-पाटील यांनी कार्यकर्त्यांसह मतदारांशी संपर्क साधायला सुरवात केली आहे. शिवसेनेचे पदाधिकारी व कार्यकर्त्यांचा मेळावा रविवारी थेरगावमध्ये झाला. 

पक्ष नियोजन करेल, त्या पद्धतीने भविष्यात निवडणुकीचे काम केले जाईल. त्यासाठी पक्षश्रेष्ठी ठरवतील त्यानुसार नेत्यांच्या सभा आयोजित केल्या जातील.
- लक्ष्मण जगताप, शहराध्यक्ष, भारतीय जनता पक्ष

भाजप-शिवसेनेचे पदाधिकाऱ्यांची संयुक्त बैठक सोमवारी पुण्यात होणार आहे. त्यात मुख्यमंत्री देवेंद्र फडणवीस व शिवसेना कार्याध्यक्ष उद्धव ठाकरे मार्गदर्शन करणार आहेत. 
- गजानन चिंचवडे, जिल्हाप्रमुख शिवसेना

पक्ष कार्यकर्त्यांची बैठक झाली आहे. एक-दोन दिवसांत काँग्रेस व राष्ट्रवादीचे पदाधिकारी व कार्यकर्त्यांची संयुक्त बैठक होईल. त्यानंतर मोठ्या सभा आयोजित केल्या जातील.
- सचिन साठे, शहराध्यक्ष काँग्रेस

रविवारी दिवसभर कार्यकर्त्यांशी संपर्क साधून वाल्हेकरवाडीत आयोजित सभेचे नियोजन केले. आजच्या सभेत पक्षश्रेष्ठी सांगतील त्यापद्धतीने प्रचाराचे नियोजन केले जाईल.
- संजोग वाघेरे, शहराध्यक्ष राष्ट्रवादी