गदिमांनी मराठीचे सौंदर्य वाढविले - डॉ. अरुणा ढेरे

पिंपरी - ‘‘गदिमांनी आपल्याला भावशुद्ध करणाऱ्या साहित्याचे देणे दिले आहे. मराठीचे सौंदर्य वाढवून आपल्यापर्यंत पोचविले आहे,’’ असे मत अखिल भारतीय मराठी साहित्य संमेलनाच्या अध्यक्षा डॉ. अरुणा ढेरे यांनी व्यक्त केले. 

महाराष्ट्र कामगार साहित्य परिषद, गदिमा प्रतिष्ठान व महाराष्ट्र साहित्य परिषद भोसरी यांच्यातर्फे भोसरीतील अंकुशराव लांडगे नाट्यगृहात आयोजित राज्यस्तरीय गदिमा जन्मशताब्दी सोहळ्याच्या उद्‌घाटनप्रसंगी ढेरे बोलत होत्या. ज्येष्ठ साहित्यिक विश्‍वास पाटील अध्यक्षस्थानी होते. महाराष्ट्र साहित्य परिषद भोसरीचे अध्यक्ष मुरलीधर साठे, कविवर्य नारायण सुर्वे साहित्य कला अकादमीचे अध्यक्ष सुदाम भोरे, कवयित्री लीनला माडगूळकर-आंबेकर उपस्थित होत्या. शिवशाहीर बाबासाहेब पुरंदरे (गदिमा जीवनगौरव), लोककलावंत प्रमिला सूर्यवंशी (लोककला), अभिनेत्री स्मिता तांबे (कलागौरव), गझलकार नितीन देशमुख (काव्यप्रतिभा), थेरगावचे खिंवसरा पाटील विद्यालय व आळंदीतील श्री ज्ञानेश्‍वर विद्यालय (संस्कारक्षम शाळा), उद्योजक दत्तात्रेय दगडे व चंद्रकांत रासकर (उद्योगभूषण) यांचा गौरव केला. कादंबरी काळीज काटा (सुनील जवंजाळ, सातारा), काव्यसंग्रह पीळ (सुनील यावलीकर, अमरावती), सृजनभान (मानसी चिटणीस, चिंचवड), कालिंदीच्या डोहातून (किशोर मुगल, चंद्रपूर), जू (संदीप वाघोले, आळे फाटा) यांना गदिमा साहित्य पुरस्काराने गौरविले. कवी अरुण पवार, अनंत राऊत, देवा झिंजाड, प्रशांत केंदळे, रमझान मुल्ला, दिनेश भोसले यांना आम्ही गदिमांचे वारसदार पुरस्कार देऊन सन्मानित केले. पुरुषोत्तम सदाफुले यांनी प्रास्ताविक केले. प्रा. दिगंबर ढोकले यांनी सूत्रसंचालन केले.