वेल्हे तालुका तीन दिवसांपासून अंधारात 

वेल्हे : पाबे (ता. वेल्हे) येथील सबस्टेशनमधील पॉवर ट्रान्सफॉर्मर गुरुवारपासून (ता.14) निकामी झाल्याने वेल्हे तालुक्‍यातील 80 टक्के गावे व भोर तालुक्‍यातील 12 गावे वीजपुरवठा खंडित झाल्याने अंधारात आहेत. 

पाबे येथील सबस्टेशनमधून पानशेत भाग वगळता मार्गासनी-विंझरपासून ते बारागाव मावळ व अठरागाव मावळातील सर्व गावांना वीज देणारी जीवनवाहिनी बंद पडल्याने जनजीवन विस्कळित झाले आहे. तालुक्‍याला वीजपुरवठा करणारे हे एकमेव सबस्टेशन असल्याने 13/11 केव्ही व्होल्टेजची एमव्हीए क्षमता असलेले उच्च दाबाचे रोहित्र अचानक बंद पडले. त्यामुळे तीन दिवसांपासून सरकारी कार्यालयांतील सर्व कामे खोळंबली आहेत.

ऑनलाइनसारखी महत्त्वाची कामे रखडली आहेत. तालुक्‍यातील अतिदुर्गम भागातील जनतेला आर्थिक व मानसिक त्रास सहन करावा लागत आहे. वीज नसल्याने पिठाच्या गिरण्या बंद आहेत. 

दरम्यान, तालुक्‍यातील महावितरणकडून दुरुस्तीचे काम युद्धपातळीवर सुरू आहे. पुणे विभागाचे उपकार्यकारी अभियंता शैलेश गिते व महावितरणची टीम हे तीन दिवसांपासून पाबे सबस्टेशनला ठाण मांडून आहेत. 

महावितरणचे उपकार्यकारी अभियंता शैलेश गिते म्हणाले, का वेल्हे व भोर तालुक्‍यातील गावांना वीजपुरवठा करणाऱ्या पाबे सबस्टेशनमधील रोहित्रात गुरुवारी बिघाड झाला. वेल्ह्यातील टीमने प्राथमिक तपासणी केली असता, केव्ही आयसोलेटचा पार्ट निकामी झाल्याचे दिसून आले. तो तत्काळ बदलण्यात आला; परंतु वीजपुरवठा पुन्हा दोन तासांनंतर खंडित झाला. पुण्याहून टेस्टिंग टीमला शुक्रवारी पाचारण करावे लागले. त्या टीमकडून तपासणी केली असता, 33/11 केव्ही व्होल्टेजची 5 एमव्हीए क्षमतेचे रोहित्र निकामी झाल्याने पुन्हा वीजपुरवठा खंडित झाला. 14 टन वजनाचे हे रोहित्र चाकणहून मागविण्यात आले. आज शनिवारी (ता.) दुपारी एकच्या सुमारास रोहित्र पाबे येथे पोचले असून चार-पाच तासांत वीजपुरवठा सुरळीत होईल, असे त्यांनी सांगितले.