जिल्‍हा परिषदेच्‍या सत्तेतून बाहेर पडा : सातव

हिंगोली : येथील जिल्‍हा परिषदेमध्ये सत्तेत असलेल्‍या काँग्रेसच्‍या सदस्यांनी सत्तेतून बाहेर पडण्याच्‍या सूचना खासदार अॅड. राजीव सातव यांनी बुधवारी (ता.१४) दिल्‍याचे विश्वसनीय वृत्त आहे. याबाबत काँग्रेसच्‍या पदाधिकाऱ्यांची बैठक झाल्‍याचे सुत्रांनी सांगितले.

जिल्‍हा परिषदेमध्ये काँग्रेस, शिवसेना व राष्ट्रवादीची सत्ता आहे. जिल्‍हा परिषदेत शिवसेना पंधरा, काँग्रेसचे अकरा तर राष्ट्रवादीचे बारा सदस्य आहेत. जिल्‍हा परिषदेत सध्या ५१ सदस्य असून बहुमतासाठी सव्वीस सदस्यांची आवश्यकता होती. त्‍यानुसार शिवसेना, काँग्रेस व राष्ट्रवादीने एकत्र येवून सत्ता स्‍थापन केली आहे. मात्र जिल्‍हा परिषदेत मंगळवारी (ता.१३) काँग्रेस व शिवसेना कार्यकर्त्यांमध्ये झालेल्‍या हाणामारीनंतर काँग्रेसने आक्रमक भूमिका घेण्यास सुरुवात केली आहे.

आज खासदार अॅड. राजीव सातव यांच्‍या उपस्‍थितीत काँग्रेस पदाधिकाऱ्यांची बैठक झाली. यावेळी आमदार डॉ. संतोष टारफे, काँग्रेसचे जिल्‍हाध्यक्ष संजय बोंढारे, जिल्‍हा परिषद सदस्य डॉ. सतीश पाचपुते यांच्‍यासह जिल्‍हा परिषद सदस्य स्‍थित होते. यावेळी खासदार अॅड. सातव यांनी काँग्रेसच्‍या सदस्यांनी जिल्‍हा परिषदेच्‍या सत्तेतून बाहेर पडण्याच्‍या सूचना दिल्‍याचे विश्वसनीय सुत्रांनी सांगितले. सत्तेत असूनही दादागिरीची भाषा ऐकून घ्यावी लागत असल्‍यानेच सत्तेतून बाहेर पडण्याच्‍या सूचना त्‍यांनी दिल्‍याचे सुत्रांनी स्‍पष्ट केले. याशिवाय राष्ट्रवादीच्‍या नेत्‍यांशी चर्चा करून पुढील निर्णय घेण्याबाबत सर्व अधिकारी आमदार डॉ. संतोष टारफे यांना देण्यात आल्‍याचे सुत्रांनी सांगितले. त्‍यामुळे पुढील काळात काँग्रेसचे अकरा सदस्य सत्तेतून बाहेर पडणार असल्‍याचे चित्र आहे. त्‍यामुळे शिवसेनेची चांगलीच कोंडी होणार असल्‍याचे बोलले जात आहे.