नदीपात्रातील रस्ता नऊ वर्षे उपेक्षितच

नदीपात्रातील रस्ता नऊ वर्षे उपेक्षितच

पुणे - नदीपात्रातून जाणारा रस्ता डीपी रस्त्याला जोडण्यासाठी अवघ्या ७०० मीटरचे भूसंपादन करण्यासाठी महापालिकेला नऊ वर्षांत यश आलेले नाही. महापालिकेच्या चार विभागांतील टोलवाटोलवीमुळे हजारो वाहनचालकांची गैरसोय होत आहे.

शनिवारवाड्याजवळील जयंतराव टिळक पुलापासून नदीपात्रातून जाणारा रस्ता म्हात्रे पुलाजवळ डीपी रस्त्याला जोडण्याचे नियोजन महापालिकेने सुमारे दहा वर्षांपूर्वी केले आहे. त्यानुसार टिळक पूल ते रजपूत झोपडपट्टी यादरम्यान रस्ता तयार झाला आहे. पुढे म्हात्रे पूल ते राजाराम पूल यादरम्यानही रस्ता तयार झाला आहे. रजपूत झोपडपट्टी ते म्हात्रे पूल यादरम्यान ७०० मीटरचे भूसंपादन झाले, की वाहनचालकांना टिळक पूल ते थेट राजाराम पूल जाता येईल.

मात्र, म्हात्रे पूल ते डीपी रस्त्यादरम्यानची खासगी जागा महापालिकेला संपादित करावी लागणार आहे. महापालिकेची जागा मालकाबरोबर चर्चा सुरू आहे. परंतु, महापालिका देत असलेला मोबदला जागामालकाला मान्य नाही. तसेच, या जागेबाबत यापूर्वी दिलेला टीडीआर चुकीच्या पद्धतीने दिल्याचे त्यांचे म्हणणे आहे. जागामालकाने २०१० मध्ये रस्ता जोडण्याच्या कामाला न्यायालयातून स्थगिती घेतली आहे. महापालिकेला ही स्थगिती अद्याप उठविता आलेली नाही किंवा जागामालकाशी चर्चा करून मार्गही काढता आलेला नाही. त्यामुळे रस्ता जोडण्याचे काम रखडले आहे.

चार विभागांची तोंडे चार दिशेला 
रस्ता जोडण्याच्या कामाला २०१० मध्ये मिळालेली स्थगिती महापालिकेच्या विधी विभागाला उठविता आलेली नाही. भूसंपादन विभागाला जागामालकाशी चर्चा करण्यात यश आलेले नाही. न्यायालयीन स्थगितीमुळे काम करता येत नसल्याचे पथ विभागाचे म्हणणे आहे. तर, बांधकाम विभागाकडून मोबदला म्हणून टीडीआर किती द्यायचा, हे निश्‍चित होत नाही. चारही विभागांचा परस्परसमन्वय नसल्यामुळे रस्ता जोडण्याच्या कामात महापालिका आयुक्तांनी लक्ष घातले, तरच काही तरी होऊ शकते; अन्यथा हा प्रश्‍न असाच राहील, असे महापालिकेच्या एका अधिकाऱ्याने नाव प्रसिद्ध न करण्याच्या अटीवर सांगितले.

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Marathi News Esakal
www.esakal.com