#OnlineServices का ठोकले महा ई-सेवा केंद्राला टाळे (व्हिडिओ)

Online-Service
Online-Service

पुणे - दाखला काढण्यासाठी जास्त पैसे उकळणाऱ्या शुक्रवार पेठेतील महा-ई-सेवा केंद्रावर शहर तहसीलदारांनी मंगळवारी छापा टाकून केंद्राला सील ठोकले.

तहसीलदार कार्यालयासमोरच (मामलेदार कचेरी) असलेल्या या केंद्रामध्ये नियमांचे उल्लंघन होत असल्याच्या कारणावरून ही कारवाई करण्यात आली. तसेच, हे महा-ई-सेवा केंद्र अधिकृत परवानाधारक मालकाऐवजी दुसरीच व्यक्‍ती चालवीत असल्याचेही समोर आले आहे.

शहरात ६८ महा-ई-सेवा केंद्रे आहेत. त्यापैकी काही केंद्रांमध्ये उत्पन्न, रहिवासी, जातीच्या दाखल्यासह अन्य दाखले काढण्यासाठी नागरिकांकडून सरकारने निश्‍चित केलेल्या शुल्कापेक्षा जादा आकारणी केली जात असल्याच्या तक्रारी होत्या. त्यामुळे तहसीलदार तृप्ती कोलते पाटील यांनी शहरातील महा-ई-सेवा केंद्रचालकांची २९ नोव्हेंबरला बैठक घेतली. या वेळी संबंधितांना नियमानुसार शुल्क घेण्याच्या सूचना दिल्या होत्या. परंतु, पूर्वसूचना देऊनही जादा शुल्क घेत असल्याच्या तक्रारीवरून या केंद्रावर छापा टाकण्यात आला. या केंद्रात दाखल्यासाठी तिप्पट-चौपट शुल्क घेत असल्याचे निदर्शनास आले.

दरपत्रकाचा फलक लावणे बंधनकारक असताना ते लावण्यात आले नव्हते. या केंद्रचालकाकडे गेल्या १२ वर्षांपासून केंद्र चालविण्याचा परवाना आहे. परंतु, दुसरीच व्यक्ती केंद्र चालवीत असल्याचे आढळून आले. प्रतिज्ञापत्रासाठी ३३ रुपये ६० पैसे दर आकारण्यात येतो. परंतु, या केंद्रचालकाकडून दीडशे रुपये आकारण्यात येत होते.

दाखल्यासाठी नागरिकांकडून जादा शुल्क आकारण्यात येऊ नये, अशा सूचना महा-ई-सेवा केंद्रचालकांना दिल्या आहेत. अधिकारी व कर्मचाऱ्यांच्या नावाने एजंटांनी जास्त पैशांची मागणी केल्यास नागरिकांनी तहसीलदार कार्यालयात तक्रार द्यावी. तसेच, नागरिकांनी जून-जुलै महिन्यात दाखले काढताना गर्दीमुळे होणारा त्रास टाळण्यासाठी आत्ताच दाखले काढून घ्यावेत. 
- तृप्ती कोलते पाटील, तहसीलदार, पुणे शहर

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com