लढा कोरोनाशी : पिंपरी-चिंचवडमध्ये पालिकेचा मोठा निर्णय; रजा, सुट्या रद्द

पिंपरी - कोरोनाचा प्रादुर्भाव रोखणे व संसर्ग झालेल्या नागरिकांना अधिकाधिक मदत पोचविण्यासाठी महापालिकेत मध्यवर्ती नियंत्रण कक्ष स्थापन करण्यात आला आहे. तसेच, आपत्कालिन स्थितीत उपाययोजना करण्यासाठी मनुष्यबळ असणे गरजेचे आहे. त्यासाठी महापालिकेच्या सर्व विभागातील अधिकारी व कर्मचाऱ्यांच्या ३१ मार्चपर्यंतच्या रजा व सुट्याही रद्द केल्या आहेत, अशी माहिती आयुक्त श्रावण हर्डीकर यांनी शुक्रवारी दिली. 

आता बातम्या ऐकण्यासाठी डाऊनलोड करा ई-सकाळचे ऍप 

शहरात कोरोना संसर्गाचा धोका निर्माण झाला आहे. या पार्श्‍वभूमीवर पिंपरीतील वायसीएम व भोसरीतील नवीन रुग्णालयात आयसोलेशन कक्ष सुरू केला आहे, असे सांगून आयुक्त हर्डीकर यांनी प्रसिद्धी पत्रकात म्हटले आहे की, कोरोनाचा प्रार्दुभाव रोखणे व संसर्ग झालेल्या नागरिकांना जास्तीत जास्त मदत महापालिकेच्या वतीने पोचवण्याच्या दृष्टीने मध्यवर्ती नियंत्रण कक्ष स्थापन केला आहे. आपत्कालीन परिस्थितीत नागरिकांना वेळेत मदत पोचविणेसाठी महापालिका अधिकारी व कर्मचारी उपलब्ध असणे अत्यंत गरजेचे आहे. त्यासाठी उपाययोजना करणे आवश्‍यक असून, महापालिकेचे सर्व क्षेत्रीय कार्यालये, सर्व विभागातील अधिकारी-कर्मचारी कामावर असणे गरजेचे आहे. त्यामुळे ३१ मार्चपर्यंत वैद्यकीय वगळून सर्व प्रकारच्या रजा संबंधित विभागप्रमुखांनी मंजूर करू नयेत. जे अधिकारी-कर्मचारी रजेवर गेले आहेत. त्यांच्या रजा रद्द करण्यात आलेल्या आहेत. अशा अधिकारी-कर्मचाऱ्यांनी त्वरित कार्यालयात रूजू व्हायचे आहे. तसेच, सर्वांनी सुटीच्या दिवशीही कार्यालयाच्या परवानगीशिवाय महापालिका कार्यक्षेत्र सोडू नये. या बाबतची सर्व कार्यवाही संबंधित विभागप्रमुखांनी करावी व आदेशाची तातडीने अंमलबजावणी करावी.