उड्डाण पुलाचे काम प्रगतिपथावर

पिंपरी - जगताप डेअरी ते साई चौकातील वाहतूक कोंडी सोडविण्यासाठी पिंपरी-चिंचवड नवनगर विकास प्राधिकरणाने हाती घेतलेल्या उड्डाण पुलाचे काम प्रगतिपथावर आहे. 

जुलैपर्यंत पुलाची एक बाजू पूर्ण करून ती वाहतुकीसाठी खुली करण्याचा प्रयत्न आहे. पहिल्या टप्प्यात खुल्या होणाऱ्या रावेत-औंध (आरएचएस) या पुलामुळे साई चौकीवरील ताण कमी होणार असून नागरिकांना काही प्रमाणात दिलासा मिळेल.

पुणे-रावेत, रहाटणी, पिंपळे सौदागर, पिंपळे गुरव परिसराला पुणे-बंगळूर या राष्ट्रीय महामार्गाशी व हिंजवडी आयटी क्षेत्राला जोडणाऱ्या साई चौकावर वाहतुकीचा मोठा ताण येत होता. त्यातच लष्कराने रक्षक रस्ता बंद केल्याने पिंपळे गुरवकडील वाहतूक साई चौकाकडे वळली होती. त्यामुळे वाहनांची अधिक भर पडल्याने येथील वाहतूक समस्या गंभीर झाली होती. गर्दीच्या वेळी चौकामध्ये चारही दिशेला दीड ते दोन किलोमीटरपर्यंत वाहनांच्या रांगा लागल्याचे चित्र नित्याचे झाले होते. चौकातील काही भाग प्राधिकरण, तर काही भाग महापालिका हद्दीत असल्याने दोन्ही संस्थांनी एकत्र येऊन उपाययोजना करावी, अशी मागणी सातत्याने होत होती.