'मुळे'ची "गटारगंगा'ही

पिंपळेनिलख - ड्रेनेज तोडुन मुळा नदी पात्रात घाण पाणी सोडले जात असताना टिपलेले छायाचित्र
पिंपळेनिलख - ड्रेनेज तोडुन मुळा नदी पात्रात घाण पाणी सोडले जात असताना टिपलेले छायाचित्र

पिंपरी - शहरातील सांडपाणी पवना आणि इंद्रायणी नदीत सोडले जात असल्याचे यापूर्वीच उघड झाले आहे. मात्र आता मुळा नदीतही सांडपाणी सोडले जात असल्याचा धक्‍कादायक प्रकार "सकाळ'ने केलेल्या पाहणीत उघडकीस आला आहे. मुळा नदीत आता राडारोड्यासह सांडपाणीही सोडण्यात येत असल्याने तिची गटारगंगा झाली आहे.

शहरातून पवना, इंद्रायणी आणि मुळा या नद्या वाहतात. नद्यांचे पाणी प्रदूषित होऊ नये म्हणून सामाजिक संस्थांसह पर्यावरणप्रेमी प्रयत्नशील आहेत. मुळा नदी यापासून वाचल्याचे बोलले जात होते. मात्र आता मुळा नदीतही थेट सांडपाणी सोडले जात आहे. शहरातील सांडपाण्यावर प्रक्रिया करण्यासाठी कोट्यवधी रुपये खर्च केले जातात. तरीदेखील काही ठिकाणी सांडपाण्यावर प्रक्रिया न करता हे पाणी थेट नदीत सोडले जाते.

निलख परिसरात नदीपात्रात राडारोडा टाकण्यात येत असल्याचा प्रकार शुक्रवारी (ता. 29) सकाळने उघडकीस आणल्यानंतर शहरात एकच खळबळ उडाली. आता मुळा नदीत थेट सांडपाणी सोडले जात असल्याचेही उघड झाले आहे. यामुळे मुळा नदीही प्रदूषणाच्या विळख्यात सापडल्याचे दिसून आले आहे.

मुख्यमंत्र्यांनीही केली होती टीका
पवना नदीकिनारी मोरया गोसावी मंदिर हे तीर्थक्षेत्र आहे. तर इंद्रायणी नदी किनारी आळंदी हे तीर्थक्षेत्र आहे. भाविक याच नदीतील पाण्याचा उपयोग करतात. ""नदी प्रदूषणाचे पाप पिंपरी चिंचवडकरांचे आहे,'' असे मुख्यमंत्री देवेंद्र फडणवीस यांनी आळंदी येथील भाषणात सांगितले होते.

ड्रेनेज विभागाची सांडपाणी मैला शुद्धीकरण प्रकल्पापर्यंत आणून देण्याची जबाबदारी आहे. आलेल्या पाण्यावर प्रक्रिया करण्याची जबाबदारी आमच्या पर्यावरण विभागाची आहे. मात्र सांडपाणी थेट नदीत सोडले जात असेल तर ती जबाबदारी ड्रेनेज विभागाची आहे, आमची नाही. आमच्याकडे आलेल्या सर्व सांडपाण्यावर प्रकिया केली जाते.
- संजय कुलकर्णी, कार्यकारी अभियंता, पर्यावरण विभाग

अतिरिक्‍त दाबामुळे ड्रेनेजलाइन फुटतात
मैला शुद्धीकरण प्रकल्पाचा वीजपुरवठा खंडित झाल्यावर सांडपाणी शुद्धीकरण न होता साठून राहते. त्यामुळे साठलेल्या सांडपाण्याचा सांडपाणी वाहिनीवर दाब वाढून ती फुटते. पिंपळे निलख परिसरातही अशाच प्रकारे सांडपाणी वाहिनी फुटली असून त्याचे काम सुरू आहे. येथे काळी माती असल्याने ही परिस्थिती उद्‌भवते.
- देवन्ना गट्टुवार, कार्यकारी अभियंता

Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Related Stories

No stories found.
Esakal Marathi News
www.esakal.com