पीएमपी ई-बस फायद्याची

पिंपरी - पर्यावरणपूरक प्रवासीसेवेसाठी पुणे महानगर परिवहन महामंडळाच्या ताफ्यात ई-बस दाखल होत आहेत. पहिल्या टप्प्यात ५४२ बस येणार असून टप्प्याटप्प्याने डिझेल बसची संख्या कमी केली जाणार आहे. डिझेल व सीएनजी बसच्या तुलनेत ई-बस कमी खर्चिक, फायद्याच्या व आरामदायी असल्याने प्रवाशांच्या पसंतीस उतरत आहेत.

पुणे आणि पिंपरी-चिंचवड महापालिका क्षेत्रासह लगतच्या सुमारे २५-३० किलोमीटर अंतरापर्यंतच्या ग्रामीण भागातही पीएमपीची सेवा सुरू आहे. परंतु, सध्या ब्रेकडाऊनचे प्रमाण अधिक असल्याने प्रवाशांना अनेकदा मनस्तापही सहन करावा लागत आहे. यातून मार्ग काढण्यासाठी व प्रवाशांच्या सोयीसाठी पीएमपीने वातानुकुलित व पर्यावरणपूरक ई-बसला प्राधान्य दिले आहे.

त्यानुसार पीएमपीच्या ताफ्यात ५४२ ई-बस दाखल होणार आहेत. त्यापैकी सुमारे ७० बस दाखल झाल्या आहेत. येत्या काही दिवसांत ४० बस दाखल होतील. सध्या १०० बसची निर्मिती सुरू आहे. येत्या दोन-तीन महिन्यांत उर्वरित बसही दाखल होणार आहेत. यामुळे पीएमपीचा ताफा वाढणार असून बसची कमतरता भरून निघणार आहे. बीआरटी मार्गावर ई-बस सोडण्याचे नियोजन असून प्रादेशिक परिवहन कार्यालयाकडे (आरटीओ) सर्व बसची नोंदणी प्रक्रिया पूर्ण झाली आहे. लवकरच या बसचा लोकार्पण सोहळा शहरात करण्याचे नियोजन आहे.