Pune Crime: पुण्यात नक्की चाललंय तरी काय? गेल्या चार दिवसात घडल्या 'इतक्या' खूनाच्या घटना

Latest Pune Murder News: कारागृहातून जामिनावर बाहेर आलेल्या गुंड आणि साथीदारांनी एका तरुणावर चाकूने वार करून त्याचा खून केला. ही घटना गुलटेकडीतील डायस प्लॉट परिसरात घडली. दरम्यान, गेल्या तीन दिवसांत शहरात खुनाची ही तिसरी घटना आहे. तर, शहर परिसरात किरकटवाडीजवळ एका तरुणावर कोयत्याने सपासप वार केल्याची घटना बुधवारी (ता. ४) सकाळी घडली.

सुनील सरोदे (वय २०, रा. डायस प्लॉट, गुलटेकडी) असे गुलटेकडीत खून झालेल्या तरुणाचे नाव आहे. या प्रकरणी स्वारगेट पोलिसांनी साहिल कांबळे, रोहन कांबळे यांच्यासह सहा संशयितांना अटक केल्याची माहिती पोलिस उपायुक्त स्मार्तना पाटील यांनी दिली. पोलिसांनी साहिल कांबळे याच्याविरुद्ध महाराष्ट्र संघटित गुन्हेगारी नियंत्रण कायद्यान्वये (मोका) कारवाई केली होती. परंतु तो नुकताच कारागृहातून जामिनावर बाहेर आला होता.

सुनील सरोदेचा भाऊ आणि आरोपींची भांडणे झाली होती. आरोपी साहिल आणि रोहन साथीदारांसह सुनीलच्या भावाला मारण्यासाठी मंगळवारी (ता. ३) रात्री डायस प्लॉट परिसरात आले होते. भावाला मारहाण करीत असताना सुनीलने त्याला वाचविण्याचा प्रयत्न केला. त्यावेळी गुंडांनी सुनीलच्या मानेवर चाकूने वार केला. त्यात मोठ्या प्रमाणावर रक्तस्राव झाल्याने त्याचा मृत्यू झाला.

खुनांच्या घटनांमुळे खळबळ

शहरात रविवारी (ता. १) रात्री सराईत गुन्हेगारांनी माजी नगरसेवक वनराज आंदेकर याचा गोळ्या झाडून आणि कोयत्याने वार करून खून केला. त्याच रात्री हडपसर परिसरात फायनान्स कंपनीतील एका कर्मचाऱ्याचा खून झाला. मंगळवारी (ता. ३) रात्री गुंडांनी गुलटेकडी परिसरात एका तरुणावर चाकूने वार करून खून केला. तर, बुधवारी (ता. ४) सकाळी किरकटवाडी फाट्याजवळ एका तरुणावर कोयत्याने वार केले. या हल्ल्यात तो गंभीर जखमी झाल्याचे पोलिसांकडून सांगण्यात आले. या घटनांमुळे शहरात खळबळ उडाली आहे.